Macarıstanın Avropa Sülh Fondunun Ermənistana hərbi məqsədlər üçün ayırdığı yardımı bloklaması haqda məlumat yayılıb. Macarıstan tələb edib ki, əgər yardım edilirsə, Ermənistanla yanaşı, Azərbaycana da olmalıdır. Avropa Birliyində bu yöndə bir fikir dəyişikliyi ola bilər?
Mövzu ilə bağlı Ednews-a politoloq Elşən Manafov bildirdi ki, Macarıstan rəhbərliyi baş nazir Viktor Orbanın timsalında hazırda Avropa Birliyinin bir sıra problemlərə münasibətdə mövqeyinə tənqidi yanaşır:
"Bu belə bir fikri səsləndirməyə əsas verir ki, Orban ilk əvvəl Macarıstanın milli maraqlarına önəm verir və AB-nin Macarıstanın maraqları ilə üst-üstə düşməyən siyasətini qəbul etmir. Orban dəfələrlə AB-nin ABŞ-ın təzyiqi altında Rusiyaya qarşı tətbiq etdiyi sanksiyalarının səmərəsiz olacağını bəyan edib. Sanksiyalara qoşulmaqdan imtina edib, Ukraynaya yönələn milyardlarla vəsaitin AB ölkələrinin sosial və təhlükəsizlik problemlərinin həllinə yönəlməsini daha məqsədə müvafiq bilib. Hətta lazım gələrsə veto hüququndan istifadə edəcəyini bildirib".
Politoloq qeyd etdi ki, Azərbaycana AB-nin sərgilədiyi qeyri-konstuktiv, bəzi hallarda qərəzli mövqeyə münasibətdə də Orban dəfələrlə etirazını bildirib.
"Bu bir tərəfdən Orbanın mövcud problemlərin həllinə münasibətdə, beynəlxalq hüququn prinsiplərinə sayğıdan, digər tərəfdən isə Azərbaycanla münasibətlərin Macarıstana verdiyi mənfəətdən çıxış edir. Azərbaycan Macarıstanın enerji təhlükəsizliyində yer alan dövlətdir. Macarıstanla bir sıra mötəbər beynəlxalq və regional təşkilatların daxilində əməkdaşlıq edir, türk Dövlətlərinin Əməkdaşlıq Şurasında müşahidəçi statusunda təmsil olunub".
Oğuz