Normal cəmiyyətlərdə mübahisələr olmur, çünki hamı sağlam düşünür.

Oskar Vayld

Təhsil vacibdir, xüsusilə, qızlar üçün əşədü-ehtiyacdır. Lakin biz burada təhsil deyərkən eləcə məktəbə gedib-gəlməyi nəzərdə tutmuruq. Təhsil cəmiyyəti formalaşdıran, ona istiqamət verən anlayışdır.

Bir uşaq üç yerdə təhsil görür - ev, məktəb və televiziya.

Azərbaycanda ev - ailə instititu, demək olar, dağılıb. Ailələr sponton yaranır. Sevmədən, bir-birini tanımadan ailə qururlar. Nəticədə, boşanmaların sayı artır. 

Məktəb. Bizdə məktəb insan yetişdirmir, sadəcə icbari bir qaydanı yerinə yetirir. Gündəlik rutinlə məktəbə gələn uşaqların üzündəki pərişanlığı hiss etməmək mümkün deyil. Uşaqlar sevgi ilə yox, məşəqqətlə dərsə gedirlər. Çünki məktəb onlar üçün öz ilkin saflığını itirib.

Televiziya da cəmiyyəti formalaşdıran digər vasitədir. Bizim televiziyalarda da bildiyiniz kimi bütün günü çalıb-oynamaq, ailədaxili münaqişələr, bir-birinin üstünə xox gəlmələr və s. Televiziyanın davamı kimi sosial media da eyni rəngdədir. Son vaxtlar çəkilən seriallar. Qətl, mafiya, intiqam, öldürmək, cinayət, oğurluq və s. 

Cəmiyyət də baş verən hadisələr də qurban axtarır. Səbəbi aydındı: içlərindəki aqressiyanı, nifrəti kimdənsə çıxmaq istəyirlər. Ötən gün yolun ortasında iki maşın bir-birləri ilə az qala toqquşacaqdı. Xoşbəxtlikdən qəza baş vermədi, amma sürücülər az qaldılar əl-bəyaxa olsunlar. Söyüş söyüdlər, ayrılıb getdilər. Bu olanlara isə adamlar tamaşa elədilər. Adamlar getdikcə çoxalırdı ki, söhbət davasız-şavasız sona çatdı. Hiss elədim ki, adamlar məyus oldular, savaş görə bilmədikləri üçün.

Həmin qızların videosuna axıra kimi baxa bilmədim. Görünür, onlar bu qızdan intiqam alırdılar. Çünki qurban olan qız səsini çıxarmırdı. 

Ailədən çıxan - natamam, eqoist, telefonun əsrinə çevrilmiş postuşaqlar. O uşaqlar gələcəyin qatili, duyğusuz insanı olacaqlar. Ona görə ki, ailədə sevgi, tərbiyə, qayğı yoxdur. Kimi, nəyi qınayasan...

Təhsil ona görə vacibdir ki, insan olduğumuzu xatırlayaq. Bizi normal bir vətəndaş kimi yetişdirsin. Təhsil məktəb deyil təkcə. Təhsil valideyndən başlayan dövlətin də iştirakı ilə yerinə yetirilən hərəkatdır. Deyəsən, biz hələ ibtidai məsələləri həll etməkdə aciz qalmışıq. Daha deyəcək sözüm qalmayıb. Nöqtə, nöqtə, nöqtə...