Suriyanı bombalamaq, yaxud bombalamamaqla bağlı qərarın qəbul edilməsi üçün ABŞ prezidenti Donald Trampın özünə ayırdığı və vəd etdiyi vaxt dünən axşam saatlarında başa çatıb.
Suriyaya zərbələr endirilmədi. Lakin bu, Suriyanın ən yaxın vaxtlarda vurulmayacağı anlamına gəlmir.
Donald Tramp Suriya prezidenti Bəşər Əsədi dəstəkləyən Rusiyanı hədələyərək bəyan edib ki, "ağıllı raketlər gələcək". Pentaqon isə Dəməşqə qarşı yeni hərbi əməliyyatın bir neçə ssenarisini hazırlayıb.
Suriya prezidenti Bəşər Əsədə sadiq qoşunların Duma şəhərində dinc insanlara qarşı kimyəvi silah tətbiq etməsi nəticəsində 70 nəfər həlak olub, təqribən 500 nəfər xəsarət alıb.
Rusiyanın XİN-i bu olayla bağlı məlumatları saxtakarlıq, feyk adlandırıb. Rusiyanın Müdafiə Nazirliyi isə məlumatı yayan "Ağ dəbilqələr" təşkilatını yalançı qruplaşma adlandırıb.
Fəqət ABŞ, Britaniya, Fransa rəsmi Dəməşqi dinc insanlara hücumda suçlayıb.
BMT-nin Təhlükəsizlik Şurası Suriyada kimyəvi silahdan istifadə olunması ilə bağlı 3 qətnamə layihəsinin heç birini qəbul edə bilməyib. Buna rəğmən, Kimyəvi Silahların Yasaqlanması Təşkilatı (KSYT) Suriyaya ekspertlərdən ibarət missiya yollayacaq.
Hücum olub?
Suriyanın Duma şəhərində dinc insanlara qarşı kimyəvi silahın tətbiq olunması şübhəli məsələ təsiri bağışlayır.
Əvvəla, Qərb Suriya prezidenti Bəşər Əsədə dəfələrlə xəbərdarlıq edərək kimyəvi silahın tətbiqinin Dəməşq üçün "qırmızı xətt"in keçməsi olduğunu deyib. Suriya ərazisinin əksəriyyəti artıq Əsədin nəzarətindədirsə, o, niyə vətəndaşlarına qarşı kimyəvi silaha əl atmalıdır?! Və ən nəhayət, əgər KSYT Suriyadakı bütün kimyəvi-zəhərləyici silah ehtiyatlarını məhv olunduğunu rəsmən bəyan edibsə, Dumada nə tətbiq olunub?
ABŞ sakitləşmir
Pentaqon isə Suriyaya qarşı hərbi əməliyyatların bir neçə ssenarisini prezident Donald Trampa təqdim edib. Britaniya və Fransa ilə birgə əməliyyat variantı da nəzərdə tutulub.
"Stratfor" analitik şirkətinin ekspertlərinin fikrincə, ABŞ-ın Suriyaya qarşı əsas məqsədi Dəməşqi kimyəvi silahdan istifadədən çəkindirməkdir.
Vurulacaq hədəflərə gəldikdə isə, onlar hərbi və rəsmi obyektlər, habelə Dumeyra, Marc Ruhail və Məzzədəki aerodromlardır.
Bundan başqa, Suriyanın hava hücumundan müdafiə sistemi və Bəşər Əsədin iqamətgahı da hədəfə alınacaq.
Hazırda ABŞ Hərbi-Dəniz Qüvvələrinin "USS Donald Cook" və "Porter" minadaşıyan gəmiləri Suriya sahillərinin yaxınlığındadır. Dünən "USS Harry S. Truman" aviadaşıyıcı gəmisinin başçılıq etdiyi, "USS Normandy" raket kreyseri ilə yanaşı, "USS Arleigh Burke", "USS Bulkeley", "USS Forrest Sherman" və "USS Farragut" minadaşıyan gəmilərindən ibarət zərbə qruplaşması ABŞ-ın Virciniya ştatındakı Norfolk limanından çıxaraq Suriya sahilləri tərəfə yollanıb.
Qruplaşma mayın əvvəllərində Suriya sahillərinə çatacaq.
Pentaqon zərbələrdə hərbi təyyarələrdən və quru qoşunlarından istifadə etmək niyyətində deyil.
The Los Angeles Times-ın məlumatına görə, ABŞ Skriyanı "hava-yer" və "yer-yer" tipli qanadlı raketlərlə vurmaq niyyətindədir.
Pentaqonu narahat edən əsas amil əməliyyat zamanı Rusiya ilə hərbi toqquşma riskidir.
Uçuşlar yasaqlandı
Avropa Aviasiya Təhlükəsizliyi Agentliyi (EASA) ABŞ və müttəfiqlərinin Suriyaya mümkün raket zərbələri ilə bağlı olaraq Aralıq dənizinin şərqində uçuşların təhlükəli olması barədə xəbərdarlıq yayıb.
72 saat ərzində naviqasiya və radioavadanlıqla problemlər yaranacağı istisna olunmadığından uçuşların yasaqlanması məsləhət bilinib.
Müharibə riski
Suriyaya zərbələr endiriləcəyi təqdirdə Rusiyanın cavab verəcəyi əsla istisna olunmur. Rəsmi Moskva bəyan edib ki, "Rusiyanın Suriyadakı hərbçilərinin həyatlarına real təhlükə yaranarsa Rusiya Suriyaya buraxılan raketlərlə yanaşı, bu raketləri buraxan təyyarələri və gəmiləri də vuracaq".
Qətiyyətini nümayiş etdirmək üçün Rusiyanın HDQ-i Suriya sahilləri yaxınlığındakı zonanı "təlim raket atışları aparılacaq bölgə" elan edib.
Hazırda Rusiya HDQ-nin Aralıq dənizindəki operativ birləşməsində Qara dəniz donanmasının 15 hərbi gəmisi var. Onların arasında "Kalibr-NK" qanadlı raketlərini daşıyan "Admiraq Qriqoroviç" və "Admiral Essen" freqatları, "Kalibr-PL" raketləri ilə təchiz olunmuş "Varşavyanka" dizel-elektrik sualtı qayığı və "Şuka-B" atom sualtı qayığı var.
Bundan başqa, Suriyaya sualtı qayıqları aşkarlayan İl-38N təyyarələri göndərilib.
Rusiya A-50 radiolokasiya aşkarlanması təyarələri vasitəsilə "USS Donald Cook" minadaşıyan gəmisinin hərəkətlərini izləyir.
Rusiya HDQ-nin Tartus limanındakı bazasını, habelə Hmeymimdəki aviabazanı qoruyan S-400 "Triumf" və "Pansir-S1" sistemləri ən yüksək döyüş hazırlığı vəziyyətinə gətirilib.
Eyni zamanda Rusiya, Suriyadakı hərbçiləri arasında hər hansı itkini ümumiyyətlə, istisna etmək üçün ABŞ-dan vuracağı hədəflərin siyahısını tələb edib.(milli.az)