Bu gün Türkiyə Cumhuriyyətinin qurucusu Mustafa Kamal Atatürkün vəfatının 80-cı il dönümüdür. Mustafa Kamal yalnız Türkiyə vətəndaşları üçün deyil, türk dünyası üçün böyük öndər və əvəzedilməz şəxsiyyətdir. Buna səbəb Qazinin bir türk millətçisi olması, ömrünü, həyatını türk millətinin rifahı və yüksəlişinə həsr etməsi və qurduğu dövlətlə özünə türk deyən bütün insanların iftixar mənbəyinə çevriməsi ilə əlaqədardır.
Atatürkün türk xalqları üçün önəmi çox böyükdür. Dünyada özünə türk deyən hər kəs Atatürk və onun qurduğu şanlı cumhuriyyətlə öyünür. Atatürkün türk dünyası üçün etdiyi ən böyük xidmət min ildən sonra yenidən türk millətininın adını təmsil edən bir dövləti, Türkiyə Cumhuriyyətini yaratması idi. Türkiyə yarandığı gündən bu günə qədər bütün dünya türklərinin son ümidi və iftixarı olmuşdur və daim olacaqdır.
Atatürk həmçinin türk dünyasının digər böyük şəxsiyyəti, Azərbaycan Xalq Cumhuriyyətinin qurucusu Məmmədəmin Rəsulzadənin dostu olmuş, iki böyük lider arasındakı dostluq bu gün Azərbaycan-Türkiyə arasındakı dostluq-qardaşlıq münasibətlərinin əsasını qoymuşdur. Atatürk Rəsulzadənin ona hədiyyə etdiyi “Azərbaycan Cumhuriyyəti” kitabının arxasındakı son vərəqdə yazır:
“Mən dünyaya səndən üç sənə öncə göz açmışam, ancaq türkün cumhuriyyət bayrağını ilk dəfə sən qaldırmısan. Bu bayraq enməsin deyə mən onu sənin əlindən alıb Türkiyə üzərində dalğalandırmışam. Enməz demisən bu bayraq enməyəcəkdir!!!”
Azərbaycanlıların qəlbində Atatürk sevgisi çox böyükdür. Buna səbəb həm Atatürkün Naxçıvanı “Türk qapısı” adlandırması və onun Ermənistana ilhaq edilməsinə mane olması, həm də 72 illik Sovet əsarəti dövründə daim Azərbaycanlıların Türkiyəni və Atatürkü xilaskar, son ümid kimi görməsidir.
Atatürk sevgisini Azərbaycanın bütün siyasi xadimlərində, bütün prezidentlərində görmək mümkündür. Azərbaycan Respublikasının ikinci prezidenti Əbülfəz Elçibəy Atatürkün və Atatürkçülüyün Azərbaycandakı təbliğatçılarından biri hesab edilir. Elçibəyin özünün anlatdığı başına gəlmiş bir hadisə xalqımızın Atatürk sevgisinə bir önrək kimi göstərilə bilər. O, qeyd edir ki, “Heç yadımnan çıxmaz, bir Atütürk döş nişanım vardı. Hər zaman ürəyimin üstündə gəzdirərdim. Meydan hərəkatında mitinqi dağıtmaq istəyən rus qoşunları biz tərəfə hücum edəndə çaxnaşma yarandı. Yıxıldım və Atatürk nişanını itirdim. Mənim nə həbs edilməyim, nə döyülməyim nə də sürgün edilməyim mənə bu qədər pis təsir etməmişdi, ancaq o gün Atatürk nişanını itirəndə çox kövrəlmişdim”.
Atatürk bütün dünya türkləri üçün bir öndərdir, başbuğdur. Onun və digər böyük öndərlərimizin əsasını qoyduğu yol müqəddəsdir və daim yaşayacaqdır. Bu yol Türkləri hürriyyətə, istiqlala və birliyə səsləyən yoldur. Atatürk bu yolun ilk yolbaylarından biri olaraq Türk tarixində silinməz bir iz qoymuşdur. Atatürkün şəxsiyyəti fanidir, 1938-ci ilin 10 noyabrında Qazi vəfat etmişdir. Ancaq Atatürkün mübarizəsi, Atatürkün yolu və onun ideyaları ölməzdir, dönməzdir və daim Türk xalqlarının təfəkküründə və qəlbində daim yaşayacaqdır!!!
