Mövzuyla bağlı I yazıda qeyd edildiyi kimi Avropada, xüsusən də Fransada erməni lobbisi olduqca güclüdür. Biz bu gücün mənbəyini araşdırarkən qarşımıza 3 məşhur erməni lobbi qrupu üzvü çıxdı və onlar haqqında bir neçə maraqlı faktı öyrəndik.
Eurasia Diary Fransadakı erməni lobbisinin ən nüfuzlu üç şəxsi barədə əsas məlumatları oxuculara təqdim edir:
Alan Prost
Anası erməni olan Fransa vətəndaşıdır, Fransanın və dünyanın ən məşhur pilotlarından biridir. Ermənipərəst mövqeyilə seçilir. Bir dəfə jurnalistlər ondan ermənilərə olan sevgisinin və dəstəyinin səbəbini soruşanda o, belə cavab verir: “Mənin anam ermənidir, onun atası, yəni, babam, məmim tərbiyəmlə xüsusi məşğul olub. Babam, uşaqlıqdan məni əsl erməni kimi böyüdüb, o mənə tez-tez ermənilərin başına gələn müsibətlərdən danışardı”.
Qeyd edək ki, Alan Prost erməni lobbi qrupları və diasporasına iri həcmdə vəsaitlər ayırıb, müxtəlif erməni vəqflərini maliyələşdirib. O, hələ də erməni diasporasının ən aktiv üzvlərindən biridir. 2007-ci ildə Alan Prost ermənilərin ölkədən xaricdə yaşayan vətəndaşlara verdiyi ən nüfuzlu titul olan “Erməni Sezarı” tituluna layiq görülüb.
Patrik Dəvəçiyan
Əslən Osmanlı ermənisidir. Nəsli 1915-ci il hadisələrindən sonra Fransaya köç edib. Fransada Xalq Hərəkatı Birliyi Partiyasının nümayəndəsi və Fransa parlamentinin üzvü olub. Fransa prezidenti Sarkozinin yaxın dostu və müşaviri olub. Qeyd edək ki, Sarkozi erməni soyqırımını dövlət səviyyəsində tanıyan ilk Fransa prezidenti idi və onun bu qərarında Dəvəçiyanın xüsusi rolu olub.
Kler Muradyan
Gələk əsas şəxsə. Hazırda Fransada və Avropada erməni lobbisinin əsas dəstəkçisi, Erməni tarixi və erməni genosidi araşdırmalarının həm müəllifi, həm də “sponsoru” Kler Muradyana. Kler Muradyan Fransa və Avropanın ən böyük elmi tədqiqat institutu olan “Elmi Tətqiqatlar üzrə Fransa Milli Mərkəzi”nin rəhbəridir. Təsəvvür edin ki, bu institutun büdcəsində 3,3 milyard dollardan çox vəsait var. 31 min işçisi olan bu mərkəzdə hər il erməni tarixi və "soyqırımı" ilə bağlı ən azı iki tədqiqat həyata keçilir. Qeyd edək ki, Muradyan erməni tarixi, Qafqaz geopolitikası və diaspora məsələləri üzrə mütəxəssisdir.
Sonda bu məqaləni yazmaqda məqsədimizi izah edək. Əvvəla, biz düşmənimizin Qərbdəki gücü və imkanları barədə araşdırma aparmaqla bir növ cəmiyyəti və diplomatik qurumları xəbərdar edirik. İkincisi, bu tədqiqat Rusiyada, Türkiyədə, İranda, Gürcüstanda, Avropada, ABŞ-da və digər dövlətlərdə yaşayan həmvətənlərimiz üçün stimul təşkil etməlidir. Sözügedən ölkələrdə yaşayan həmvətənlərimiz əsas güc və imkanlarını Azərbaycanın haqq davasının dünyaya çatdırılmasına həsr etməlidirlər. Ermənistan üzərində iqtisadi, hərbi və psixoloji üstünlüyümüz olsa belə təəssüf ki, hələ də diaspora işi və lobbiçilikdə onlardan geridəyik. Və burada əsas iş ölkədən xaricdə yaşayan vətəndaşların payına düşür. Onlar daim aktiv olmalı, ana vətənin maraqları naminə böyük səylə çalışmalı və ən əsası həmrəy olmalıdırlar...
Nicat İsmayılov
