Azərbaycanı Belarusun paytaxtı Minskdə keçiriləcək "Junior Eurovision 2018" beynəlxalq mahnı müsabiqəsində Prezident təqaüdçüsü Fidan Hüseynova təmsil edəcək
Eurasia Diary xəbər verir ki, bu barədə İctimai Televiziya və Radio Yayımları Şirkətində (İTV) "Junior Eurovision 2018" mahnı müsabiqəsi ilə bağlı keçirilən mətbuat konfransında məlumat verilib.
Tədbirdə İctimai Televiziya və Radio Yayımları Şirkəti Mərkəzi Aparatının rəhbəri Faiq Qürbətov, İTV-nin Musiqi, bədii və xüsusi layihələr departamentinin rəhbəri Leyla Quliyeva iştirak ediblər.
L.Quliyeva bildirib ki, Fidan Hüseynova fransalı müğənni Lara Fabianın konsertində səhnəyə çıxaraq mahnı ifa etməsi ilə yadda qalıb: "Onun həmçinin Elnur Hüseynovla dueti var. Fidanın ifa edəcəyi mahnı hələlik məlum deyil, yarışmanın qaydalarına əsasən, mahnı ifaçının iştirakı ilə yazılacaq. Azərbaycan istedadlar ölkəsidir. Niyə də bizim uşaqlarımız haqqında dünyada məlumat olmasın. Əgər belə bir imkanımız varsa, niyə də bundan yararlanmayaq. Bu, bizim istedadlı uşaqlar üçün böyük bir stimuldur".