Beynəlxalq təşkilatların üzvü olan bir qrup portuqaliyalı ekspert ölkəmizdə səfərdədir. 20 Yanvar faciəsinin ildönümü ərəfəsinə təsadüf eliyən səfər zamanı onlar Şəhidlər Xiyabanını ziyarət ediblər.
Ziyarətdən sonra qonaqlar Beynəlxalq Avrasiya Mətbuat Fondunun ofisində olaraq, Fondun prezidenti Umud Mirzəyevlə görüşüblər.
Umud Mirzəyev qonaqları 20 Yanvar faciəsinin tarixi və günahsız insanların vəhşicəsinə qətli barəsində məlumatlandırıb: "Biz bilirik ki, qərənfil Portuqaliya inqilabının simvolu sayılır. 20 Yanvar faciəsindən sonra bu simvol Azərbaycan üçün də həssas məna kəsb edir. Bu əlamət bizim ölkələrimizi mənəvi olaraq bir- birinə bağlayır."
Qonaqlar səfər təəssüratlarını Eurasia Diary ilə bölüşüblər.
Mədəniyyətlərarası Assosiasiyanın rəhbəri Aleksandr Kutinyo Azərbaycan haqqında təəssüratlarını dilə gətirib.
"25 aprel 1974-cü ildə Portuqaliyada "Qərənfil İnqilabı" baş verib, ordu hökümətə qarşı ölkədə nəzarəti ələ aldı, amma bir güllə belə atılmadı. Onlar əllərində bir az əvvəl Xiyabanda gördüyümüz bu güllərlə meydanlara axışmışdılar, qərənfilləri burda görmək mənə çox təsir etdi" - deyə, Aleksandr bildirib.
A.Kutinyo daha sonra əlavə edib: "Qorbaçov barədə kifayət qədər informasiyam var, Sovet İttifaqını yaxşı tanıyıram, Sovet İttifaqını bitirdiyi üçün Qorbaçovu yaxşı bir prezident kimi tanıyırıq, amma biz burada edilənlər barədə məlumatları bildikdə fikirimiz dəyişdi"
"Burada olduğumuza çox şaddıq, çox dinc, sakit ölkəniz var. Bakı çox təhlükəsiz və gözəl şəhərdir, milli yeməklərdən daddıq, həqiqətən, çox gözəl idi" – bunu psixoloq Karolina Lourenso deyir. "Buraya gələnə qədər ölkə ilə bağlı kifayət qədər məlumatım yox idi. Qanlı Yanvarda nə baş verdiyini hər kəsin bilməyi lazımdır, çünki biz yenə eyni səhvləri təkrarlaya bilmərik".
Karolina Lourenso Bakı ilə bağlı hisslərini belə ifadə etdi: "Biz şəhərdə gəzərkən, burada Asiya və Avropa arasında gözəl bir qarışığın mövcudluğu barədə söhbət edirdik. Yenidən buranı görmək üçün şəhərinizə təkrar gəlmək istəyirəm".
Mülki və ətraf mühit Mühəndisi Pedro Pinto şəhərin gözəlliyi və Bakıda müxtəlif üslubların mövcudluğu barədə danışdı:
"Mənim Qara Yanvar haqqında məlumatım yox idi, bu barədə dünya mətbuatında çox az məlumat var. Biz dəfələrlə bu cür faciələrə toxunmalıyıq və burada yaşananlar dünya üçün bir utancdır ".
"Bakıya gəlməzdən əvvəl şəhərin fotoşəkilləri və videolarını gördüm, amma burada gəldiyim zaman daha çox təəsirləndim" - dizayner Ana Almeyda söyləyib.
"20 Yanvar haqqında məlumat üçün təşəkkür edirik. Bu cür dəhşətlərin təkrar baş verməməsi üçün bu günü xatırlamaq olduqca vacibdir"
Layihə meneceri Vitor Mendes Bakıda ikinci dəfə olduğunu və ilk səfərindən bəri şəhərin çox inkişaf etdiyini söylədi:
"Mən 2008-ci ildə Bakıda olmuşam, bu 10 ildən müddətində 40-dan çox şəhərə səfər eləmişəm, amma heç vaxt Bakıya bənzər şəhəri görmədim. Portuqaliyaya gəldiyim gün Bakıya təkrar gəlmək üçün özümə söz verdim. Aleks mənə Azərbaycanla əməkdaşlıq etmək şansımızın olduğunu söyləyəndə mən çox sevindim".
"Mən burada olanda, Qara Yanvar haqqında məlumat almışdım, dərindən təəssüfləndim və çox qəzəbləndim, çünki insanlar dinc nümayişə çıxanda ordunun onlara hücum etməsi çox kədərlidir".
Xoş təəsrütlarla ayrılan qonaqlar yenidən ölkəmizə səfər edəcəklərini bildiriblər. Onlar dünyanı sülh və birliyə səsləyərək, 20 Yanvar kimi hadisələrin bir daha təkrarlanmamasını və günahsız insanların qətl edilməməsini diləyiblər.
Müsahibəni götürdü: Ülvi Əhmədli