Bugün Beynəlxalq Mətbuat mərkəzində "Babək 44" taborunun döyüş yolu haqqında çəkilən eyniadlı sənədli filmin nümayişi keçirilib. Əvvəlcə Xocalı soyqırımının qurbanlarının xatirəsi bir dəqiqəlik sükutla yad edilib.
Eurasia Diary-nin məlumatına görə, tədbirin əvvəlində sənədli filmin ssenari müəllifi Səməd Hətəmov nitq söyləyib. Qeyd edək ki, filmin rejissoru İsrafil Xanlarovdur. Tədbirdə filmin çəkiliş heyəti ilə yanaşı, "Babək 44" taborunun ilk komandiri, polkovnik Elxan Qəniyev, polkovnik Abukər Mirzəyev, döyüşçülərdən isə Nazim Quliyev, çavuş Namiq Məmmədov da çıxış edib. Onlar keçdikləri ağır döyüş yolunun filmdə necə əks olunduğu barədə fikirlər söyləyiblər. Əlavə olaraq, filmin ssenari müəllifi çəkilişlərin heç bir maddi yardım, sponsor dəstəyi olmadan çəkildiyini xüsusi vurğulayıb. Qeyd edək ki, sənədli film 15 günə ərsəyə gəlib.
Tədbirin ikinci hissəsində "Babək 44" taboru adlı filmə baxış olub. Sənədli filmin ilk 10 dəqiqəsində taborun yaranma tarixi, keçdiyi döyüş yolu, taborun şücaət göstərdiyi əsas ərazilər qeyd olunub. Filmin çəkilişləri zamanı Dağlıq Qarabağ uğrunda, Ağdərə ətrafında gedən döyüş kadrlarından, həmçinin döyüşlərdə iştirak etmiş olan hadisə şahidlərinin, komandirlərin, şəhid valideynlərinin müsahibələrinin yer aldığı kadrlardan istifadə olunub.
Sənədli filmdə əsas fikirləri səsləndirən Abukər Mirzəyev, Nazim Quliyev, Namiq Məmmədov, Tapdıq İbrahimov, Elxan Qəniyev çəkilişlərdə yaxından iştirak ediblər. Əsas məqamlardan biri isə gizir Tapdıq İbrahimovun öz vəsaiti hesabına Buzovna qəsəbəsində "Babək 44" taborunun şərəfinə saldırdığı parkın filmdə nümayiş olunmasıdır. Bu parkda AXC-nin 100 illiyinə həsr olunan abidə də yerləşir. Qeyd edək ki, filmdə onun adına uyğun olaraq "Babək" filminin kadrlarından da istifadə olunub.
Bununla yanaşı, tədbirdə Azərbaycan bayrağı ordenli şəhid Yaşar Rəhimov haqqında yazılan kitabın müəllifi Əli Həsən film və tabor haqqında öz fikirlərini bildirib və nitqini özünün yazdığı "Təki vətən sağ olsun" adlı şeiri ilə tamamlayıb. Tədbir sonda filmin ssenari müəllifi Səməd Hətəmovun qələbə haqqında söylədiyi inamlı nitqi ilə yadda qalıb.