Ötən ayın əvvəllərindən başlayaraq, müxtəlif ticarət mərkəzlərində qablaşdırılmış alça, çiyələk, ərik kimi meyvələrə rast gəlirik. Satıcılar bildirir ki, sözügedən meyvələrin bəziləri yerli, bəziləri xarici ölkələrdən gətirilib.
Yerli təsərrüfatçılar bölgəmizdə hazırda satılan meyvələrdən alçanın indi yetişməyə başladığını, ərik və çiyələyin isə hələ ki kütləvi satışa çıxarılacaq qədər yetişmədiyni bildirib.
Teleqraf.com xəbər verir ki, satışda olan məhsullar istixanalarda xüsusi kimyəvi perparatlarla yetişdirilən meyvələrdir.
Mütəxəssislər bildirir ki, təbii yolla yetişdirilən çiyələk və alça sağlamlığa faydalıdır. Vitamin və mikroelementlərlə zəngin olan bu giləmeyvələr diş əti, mədə-bağırsaq, ürək qan-damar, tənəffüs sistemi problemlərinə qarşı təsiredici qüvvəyə malikdir. Lakin xüsusi dərmanlarla hazırlandıqda mədə-bağırsaq sistemini pozur, allergik problemləri kəskinləşdirir.
Həkim Nazir Adilov bildirib ki, "Kimyəvi maddələrdən çox istifadə etdikdə, yaxud da ki həmin məhsullar yuyulmadıqda xəstəliklər baş verir. Belə olanda həmin xəstələrin mədəsi yuyulur, müalicə edilir".
Hazırda satışda olan çiyələk və alçanı xüsusilə uşaqlara vermək tövsiyə olunmur. Uşaq orqanizmi üçün faydalı olan bu meyvələri mövsümündə yemək lazımdır. Əks halda azyaşlıların səhhətində problemlər yarana bilər.