Xəbər verdiyimiz kimi, bu gün Nyu Yorkda Azərbaycan və Ermənistan xarici işlər nazirlərinin görüşü baş tutub. Görüşdə Ermənistanda yeni formalaşmış hökumətin Qarabağ probleminə yanaşması və Paşinyanın BMT-dəki çıxışı müzakirə edilib. Bugünkü görüş hələ başlamadan əvvəl artıq ekspertlər onun informasiya mübadiləsi xarakteri daşıyacağını və bu görüşdən problemin həlli ilə bağlı konkret bir fikrin çıxmayacağını bildirmişdilər. Eurasia Diary-nin mövzu ilə bağlı suallarını siyasi ekspert Arzu Nağıyev cavablandırıb.
- Qarabağ probleminin həlli üçün bugünkü görüş nə kimi əhəmiyyətə malikdir?
- Tərəflər uzun zamandır bir araya gəlmirlər. Və bu zaman müddətində Paşinyanın münaqişəyə dair önəmli açıqlamaları olub. Həmçinin, bir gün əvvəl o BMT-də öz çıxışında da bəzi narahatlıq yaradan fikirlər səsləndirib. Bütün bunları nəzərə alaraq bugünkü görüşün ən azından tərəflərin bir-birini daha yaxşı başa düşməsi və qarşılıqlı informasiya mübadiləsinin həyata keçirilməsi üçün vacib hesab edirəm.
- Ermənistanda formalaşan Paşinyan hökuməti münaqişənin həllində nə qədər maraqlıdır?
- Paşinyan hökuməti küçədən gələn bir hökumətdir. Planlı və real siyasət yürütmək imkanlarından məhrumdurlar. Seçki öncəsi problemin həlli üçün güzəştə getmək isə ümumiyyətlə Paşinyanın şəxsi maraqlarına uyğun deyil. Ona görə də hal-hazırda daha çox bu məsələyə emosional yanaşmağa və populist açıqlamalara üstünlük verir. Yəni, hal-hazırda erməni hökuməti problemin həllində maraqlı deyil.
- Madrid prinsiplərini və onların bu gün reallaşdırıla bilinməməsini necə dəyərləndirirsiniz?
- İstər Madrid prinsipləri, istər Vyana, istərsə də digər görüşlərdə irəli sürülən prinsiplər tam şəkildə Azərbaycanın suverenliyi və ərazi bütövlüyünü təmin etmir. Hansı prinsip qəbul edilirsə edilsin, burada mütləq Azərbaycanın ərazi bütövlüyü öz əksini tapmalıdır. Əslində, Paşinyan da hakimiyyətə gəlmədən əvvəl Madrid prinsiplərini ideal hesab edirdi, lakin o zaman 7 rayonun qaytarılmasına dair dediyi fikirlərə görə hazırda bir çox yerli muxaliflər onu vətən xaini adlandırırlar. Ona görə də Paşinyan indi bu fikirlərindən tamamilə yayınmışdır.
- Azərbaycan-İran-Rusiya-Türkiyə yaxınlaşmasının münaqişənin həllinə təsiri ola bilərmi?
- Məncə, xeyr. Çünki bu dövlətlər son dövrlər müttəfiq olsalar da hər birinin ayrı-ayrı maraqları var.
- Bəs Azərbaycan ermənilərin diplomatik danışıqlardan yayınması halında problemin müharibə yolu ilə həll edilməsilə bağlı addım ata bilərmi?
- Azərbaycan Aprel döyüşlərində olduğu kimi kiçikmiqyaslı “anti-terror” əməliyyatları ilə rəqibinə cavab verə bilər. Azərbaycan regionda müharibə tərəfdarı deyil və müharibə aparmır. O sadəcə öz tarixi torpaqlarını terrordan təmizləyir. Genişmiqyaslı müharibəyə qaldıqda isə əvvəla, bu Azərbaycanın beynəlxalq imicinə ziyan vura bilər. Həmçinin, baş verə biləcək istənilən müharibə regionda bütün dövlətlərin maraqlarının əleyhinədir. Ona görə də yaxın gələcəkdə müharibə ehtimalı olduqca zəifdir.
Müsahibəni götürdü: Nicat İsmayılov