Təəsüflər ki, reket və sarı mətbuat ölkəmizdə təmin olunan fundamental azadlıqlardan sui istifadə edir. Bununla mübarizə sadəcə dövlət qurumları deyil, eyni zamanda cəmiyyət tərəfindən də aparılmalıdır.
Mətbuat Şurasının sədr müavini və Beynəlxalq Avrasiya Mətbuat Fondunun prezidenti Umud Mirzəyev yaranmış vəziyyətlə bağlı fikirlərini Lider TV ilə bölüşüb.
O, Mətbuat Şurasının bu qüsurlara qarşı ən sərt tədbirləri müəyyənləşdirdiyini söyləyib. “Ölkəmiz müstəqillik əldə etdikdən sonra qanunvericiliyimizdə müəyyən boşluqlar mövcud idi və senzuranın ləğvi, mətbuat azadlıqlarının təmin edilməsi üçün addımlar atıldı. Lakin çox təəssüf ki, bundan sonra bir sıra fəndgir və işbaz adamlar müxtəlif səpgidə mətbuat orqanları açdılar”, - deyə Umud Mirzəyev söyləyib.
Umud Mirzəyev adı çəkilən dövrdə bu cür qurumlar tərəfindən müəyyən məqsədlər həyata keçirməyə çalışılsa da Mətbuat Şurası yaradıldıqdan sonra azad sözə xələl gətirən şəxslərə qarşı sərt və kəskin mövqe ortaya qoyulduğunu bildirib
Medianın dəyişikliyinə xüsusi toxunan Umud Mirzəyev artıq ənənəvi mediadan savayı internet mediasının geniş yayılmasını qeyd edərək, mətbuatda yeni vasitələrin və imkanların yarandığını qeyd edib. Nəhayətdə çap mediasında yaranan problemlər internet mediasına keçərək məkan dəyişdi.
“Jurnalistika bu peşə ilə məşğul olan adama bir çox imtiyazlar, imkanlar verir, ona fikrini ifadə etmək üçün meydan yaradır, lakin unutmayaq ki, eyni zamanda bunun bir məsuliyyəti də var. Peşəkar jurnalist öz məsuliyyətindən zərrə qədər də olsun yayınmayan şəxsdir. Əsas problem də peşakarlığın azlığındadır”.
Umud Mirzəyev dövlətimizdə yaradılan bu şəraitdən ölkəmizin problemlərini işiqlandırmaq yerinə qara və məkrli niyyətlərin yayılmasından narahatlığını ifadə edib.
“Jurnalistika faktlara istinad edərək bir neçə mənbədən istifadə etməlidir. İnsanların şəxsi həyatına müdaxilə edərək, hədə-qorxu gəlmək və vəsait tələb etmək utancvericidir və jurnalist adına qara ləkədir”, - deyə vurğulayıb.
Umud Mirzəyev saxta press-kartlarla bağlı fikrini bildirdi. “Bəzən bir şəxsin əlində bir neçə press-kartlar cəmlənir və bu şəbəkənin arxasında iş adamları, fiziki şəxslər dayanır. Onların konkret tipləri olmasa da hədəfləri var. Bu insanlar bir şəbəkədir, onlar ayrı-ayrılıqda fəaliyyət göstərmir. Bir yazının müxtəlif saytlarda eyni cür yayımlanmasının şahidi oluruq”.
Lakin bütün bunlar bizim şərəfli jurnalistika tariximizə ləkə sala bilməz. Bizim mətbuatımız inkişaf yolundan qalmır və hələ Cumhuriyyət dövründən belə mətbuat qanunumuz mövcud olub, deyə cənab Mirzəyev bildirib.
Mətbuatımızın adına xələl gətirən bu ünsürlərə qarşı Mətbuat Şurası ilə yanaşı, hüquq mühafizə orqanları və cəmiyyət özü də mübarizə aparır.
Beynəlxalq Avrasiya Mətbuat Fondu Azərbaycanın həqiqətləri, ağrılı problemlərini və bundan əlavə ölkəmizin inkişafını da dünyaya çatdırır. Əlbəttə, ölkəmizin problemləri də var, lakin biz bu problemlərlə bağlı mübarizə aparmalıyıq, məkrli fikirlərdən, yanlış yollardan yayınmalıyıq, deyə Umud Mirzəyev söyləyib.
Ülvi Əhmədli
Eurasia Diary