Fələstin və İordaniya mənşəli jurnalist və sənədli filmlərin rejissoru, Qətərdəki Əl-Cəzirə beynəlxalq telekanalında Media Məsləhət Şurasının rəhbəri Müntəsir Marai Azərbaycana turist kimi səfər edib. O, şəhərin görməli yerlərilə yanaşı, Əl Cəzirə ilə iş sahəsində uzun illər təcrübəsi olan qeyri-hökumət təşkilatı Beynəlxalq Avrasiya Mətbuat Fondunda (BAMF) olub.
BAMF-ın prezidenti Umud Mirzəyevlə görüş zamanı Müntəsir Maraiyə Fondun fəaliyyətinin əsas istiqamətləri barədə məlumat verilib. Sənədli filmlərin peşəkar rejissoru olaraq, o Azərbaycanın cəbhə bölgələrindəki uşaqların həyatından bəhs edən "Uşaqlar və münaqişələr" adlı qısametrajlı filmə xüsusi diqqət yetirmişdir. Film daha öncə təşkilata aid studioda ərsəyə gəlmiş və Birləşmiş Millətlər Təşkilatının Cenevrədəki qərargahında təqdim olunmuşdur. Tərəflər həmçinin, yaxın gələcəkdə qurumlar arasındakı əməkdaşlığın möhkəmləndirilməsi yollarını müzakirə ediblər.
Görüşün sonunda Müntəsir Marai Azərbaycana səfəri barədə
Eurasia Diary-nin müxbiri ilə öz təəssüratlarını bölüşüb.
"Bu, Azərbaycana ilk səfərimdir. Həmişə olduğu kimi əvvəlcədən heç nə planlamadım və gəlməmişdən əvvəl bu ölkə haqqında məlumatım yox idi. Bir şey haqqında ilk dəfə eşidərkən və ya bir şeyi ilk dəfə görərkən keçirilən hissləri sevirəm.
Bura turist kimi gəldim və çox xoşuma gəldi. Hesab edirəm ki, Bakının hər bir binası və küçəsinin öz tarixi var. Şəhər ətrafında gəzməyi və keçmişlə gələcək arasındakı kontrastı görməyi sevirəm. Burada çox sayda yeni binalar və qədim memarlıq nümunələri var. Bakıda insanlar çox qonaqpərvərdir. Onlar hələ də qəlblərində öz tarixini qoruyur, eyni zamanda, gələcək və onunla bağlı hər bir şey üçün açıqdırlar. Yəni bu, bir növ harmoniyadır".
İçərişəhərdə müxtəlif insanlarla ünsiyyət qurmaq Maraiyə xüsusilə maraqlı gəlmişdi.
"Müxtəlif insanlar haqqında ədəbi hekayələr yazan bir insan üçün qədim əşyalar satılan mağazalara baş çəkmək, xüsusilə də İçərişəhərdə insanlarla söhbət etmək çox maraqlıdır, çünki bu insanlar tarixlə əhatə olunmuşdur. Satıcıları yalnız əşyaların və əntiq malların satılması maraqlandırmır, müştərilərlə danışmaq da istəyirlər. Söhbət zamanı onlar sizi tarixə səyahət etməyə dəvət edir.
Bir hadisəni danışım. Mal aldığım satıcılardan biri ertəsi gün məni küçədə tanıdı. Mən ətrafıma fikir vermədən gedirdim və o məni tanıdı. Mən ölkəni tərk etməzdən əvvəl onunla görüşməyə söz verdim. Maraqlıdır ki, burada insanlar çox sadədir və ünsiyyətə çox açıqdırlar".
Müntəsir Marainin sözlərinə görə, insanlar arasında ünsiyyət Azərbaycanın ərəb dünyasında inkişafını təşviq edəcək və bu, onun bura yenidən gəlməsi üçün yaxşı bir səbəbdir.
"Əlbəttə ki, bir neçə gün Bakı şəhərini özün üçün kəşf etməyə kifayət etmir və bu bura bir daha gəlmək üçün yaxşı bir səbəbdir. İndi hiss edirəm ki, ərəb dünyasında regionun bu hissəsi barədə çox az şey bilirik və bir-birimizi daha yaxşı tanımaq üçün daha çox səy göstərməliyik, çünki biz bir çox ümumi dəyərlərə sahibik. Bölgələrimiz çox yaxındır, amma bura gəlməzdən əvvəl mən Azərbaycana nə qədər yaxın olduğumu təsəvvür belə etmirdim. Hesab edirəm ki, xalqlar və hökumətlər Azərbaycanı tanıtmaq üçün çox işlər görməlidir və fikrimcə, aramızda yaranan daha sıx ünsiyyət bu prosesə töhfə verəcək".
Müsahibəni götürdü: Anastasiya Lavrina