Bu günlərdə Azərbaycanda qonaq olan Qətər Universitetinin professoru, əslən irlandiyalı Tomas Ross Qriffin Bakıda Beynəlxalq Avrasiya Mətbuat Fondunun prezidenti Umud Mirzəyevlə də görüşüb. Görüşdən sonra professor səfər təəssüratlarını Eurasia Diary saytına danışıb

- Azərbaycana gəldikdən əvvəl və sonra Azərbaycan haqqında təəssüratınız necədir?

- Buraya gəlməzdən əvvəl ölkəniz haqqında az məlumata sahib idim. Mənim maraq dairəm idman və mədəniyyət sahəsidir. Yalnız Formula 1 və Eurovision-dan Azərbaycan haqqında  eşitmişdim. Tarix baxımından, sadəcə, buranı postsovet ölkəsi kimi tanıyıram. Buraya gəldiyim zaman, düzünü deyim ki, çox təəccübləndim. Bu ölkənin tarixinin min illərlə qədimə dayandığını gördüm. Bakını gördükdə çox heyrətləndim, bura Avropa şəhərlərinə, məsələn, Parisə bənzəyir. Burada müxtəlif mədəniyyətlərdən olan insanların harmoniya içində yaşadığını görmək çox xoşdur. Başqalarına da tövsiyə edə biləcəyim yerdir.

- Azərbaycan mədəniyyəti haqqında nə deyə bilərsiniz?

- Ümumiyyətlə, iqlim və torpaq öz vətənimi - İrlandiyanı xatırladır. Burada çox müxtəlif imperiyalar mövcud olub. Azərbaycan iki qitənin kəsişməsində yerləşir. Bu, onun mədəniyyətinə də təsir göstərir. Ölkəyə tarixən müxtəlif millətlər gəlib və yaşayıb. Azərbaycanda tolerantlığın olması, insanların bir-birini başa düşməsi və qəbul etməsi gözəldir.

- Ölkəmizin turizm potensialını necə dəyərləndirirsiniz?

- Turizm potensialı çox böyükdür, iqlim və təbiət çox əlverişlidir. Öz sahəmdəki biliklərə əsaslanaraq görürəm ki, Azərbaycan idman siyasətindən istifadə edərək, turizm potensialını artırır. Beynəlxalq yarışlara ev sahibliyi etməsi buna misaldır.

- Öz ölkənizə qayıtdıqda Azərbaycanı necə təsvir edəcəksiniz?

- Vətənim İrlandiyadır, ancaq mən Qətərdə yaşayıram. İrlandlarla söhbət edəndə Azərbaycanın  İrlandiyaya bənzədiyini söyləyəcəyəm, buraya çox oxşar olduğundan danışacağam. Kənd təsərrüfatının yayılması və təbiəti İrlandiyanı xatırladır. Şəhərə dönəndə isə canlı mədəniyyətlə üzləşirsən.