Erməni politoloq Ağası Yenokyan hesab edir ki, son bir neçə ay ərzində Azərbaycan Ermənistan üzərində əhəmiyyətli üstünlük qazanıb və ölkəmizin danışıqlar prosesindəki mövqeyi əvvəllər olduğundan daha güclüdür.
Eurasia Diary-nin məlumatına görə, A.Yenokyan bunu aysor-a açıqlamasında, Azərbaycan Prezidenti İlham Əliyevin verdiyi son müsahibədə "Azərbaycan Ermənistan qarşısında həm müzakirə masasında, həm də döyüş meydanında üstünlüyə malikdir" sözlərini şərh edərkən deyib.
Xatırladaq ki, Prezident İlham Əliyev Real TV-yə müsahibəsində Dağlıq Qarabağ ətrafındakı vəziyyəti şərh edərkən deyib ki, "bu gün Azərbaycan həm müzakirə masasında, həm də döyüş meydanında üstünlüyə malikdir".
Politoloqun sözlərinə görə, "ritorikanın dəyişməsi və əvvəlki fikirlərin kəskinləşməsi də Azərbaycanın daha əlverişli mövqeyindən xəbər verir".
"Bütün bunları nəzərə alaraq, deyə bilərəm ki, İlham Əliyevin dedikləri doğrudur. Azərbaycanın döyüş meydanındakı statusuna gəlincə, açıq informasiya mənbələrinin son bir neçə il ərzində bizim rəqibimizin əldə etdiyi silahların miqdarı haqda açıqlamalarına əsasən demək olar ki, Əliyev burada da haqlıdır", - deyə Ağasi Yenokyan bildirib.
O hesab edir ki, danışıqlar prosesində Ermənistanın atdığı addımlar Azərbaycan Prezidentində ümid yaradıb.
"İlham Əliyevin bu cür ritorikası, Ermənistanın hərəkətləri fonunda, Azərbaycanın hərəkətləri ilə bağlıdır", - deyə erməni ekspert vurğulayıb.
Xatırladaq ki, Azərbaycan Prezidenti həmin müsahibəsində demişdi: “Biz son illər ərzində münaqişənin həlli üçün güclü hüquqi baza yaratdıq. Dünyanın bir çox mötəbər aparıcı beynəlxalq təşkilatları münaqişə ilə bağlı həqiqəti əks etdirən, bizim mövqeyimizi dəstəkləyən qətnamələr, qərarlar qəbul etmişlər - BMT-nin Baş Assambleyası, ondan əvvəl Təhlükəsizlik Şurası, ATƏT, Qoşulmama Hərəkatı, İslam Əməkdaşlıq Təşkilatı, digər təşkilatlar. Avropa İttifaqı ilə Azərbaycan arasında imzalanmış Tərəfdaşlıq Prioritetləri sənədində ərazi bütövlüyümüz, suverenliyimiz, sərhədlərimizin toxunulmazlığı haqqında dəstək ifadə olunub. Yəni, bu, münaqişə üçün hüquqi baza yaradır. Hüquqi baza ondan ibarətdir ki, Dağlıq Qarabağ, - bunu biz hamımız yaxşı bilirik, - Azərbaycanın ayrılmaz hissəsidir. Münaqişənin həlli yalnız və yalnız ölkəmizin ərazi bütövlüyü çərçivəsində mümkündür.
Ermənistanın yeni hökuməti birinci mərhələdə çox ziddiyyətli bəyanatlar verirdi ki, Azərbaycan Ermənistanla yox, qondarma “Dağlıq Qarabağ respublikası” ilə danışıqlar aparmalıdır. Biz əlbəttə ki, bu ziddiyyətli və anlaşılmaz bəyanatları dərhal rədd etdik. O cümlədən vasitəçilər də əlbəttə ki, belə bir mövqe ilə razılaşa bilməzdilər. Öz prinsipial mövqeyimizdə qalaraq biz danışıqlar prosesinə sadiqik. Bu gün danışıqlar Ermənistan və Azərbaycan xarici işlər nazirləri arasında aparılır. Artıq bir neçə raund danışıqlar aparılıb. Biz ümid edirik ki, bu danışıqların nəticəsi olacaqdır. Ona görə danışıqların aparılması əlbəttə ki, müsbət hal kimi qiymətləndirilə bilər. Bu, bir daha onu göstərir ki, Ermənistanın yeni rəhbərliyinin ilk mərhələdə bəyan etdiyi prinsiplər tamamilə qəbuledilməzdir.
Eyni zamanda, biz güclü iqtisadi potensial yaradaraq güclü ordu da yaratmışıq. Bu gün Azərbaycan Ordusu dünyada güclü ordular sırasındadır. Bizim döyüş qabiliyyətimiz, imkanlarımız artır. Biz ordumuzu ən müasir texnika ilə təchiz edirik. Aprel döyüşləri bizim gücümüzü göstərdi. Ən əlverişsiz hərbi mövqelərdən əks-hücum əməliyyatı apararaq biz strateji yüksəklikləri əldə etdik. Torpaqlarımızı işğalçılardan azad etdik. Bu gün Ağdərə, Füzuli, Cəbrayıl rayonlarında Azərbaycan bayrağı dalğalanır. Aprel döyüşləri bizim şanlı tarixi qələbəmizdir...
Aprel döyüşlərindən iki il sonra uğurlu Naxçıvan əməliyyatı keçirildi. O, taktiki baxımdan fərqli əməliyyat idi, ancaq nəticə etibarilə çox uğurlu idi və bizə imkan verdi ki, strateji yüksəklikləri, dağları tam nəzarətə götürək və bu dağlardan düşmənin strateji kommunikasiyalarına nəzarət edək...”.
Natiq Hüseynzadə
