Bloqer Lapşin Azərbaycanda ona qarşı yeni cinayət işi açıldığını bildirib. Azərbaycanda terrorçuluğa çağırış və dövlət əleyhinə çıxış etdiyi üçün Aleksandr Lapşinə qarşı cinayət işi açılıb.
Azərbaycan Prezidenti 11 sentyabr 2017-ci il tarixli sərəncamı ilə dövlət sərhəddini qanunsuz keçdiyi üçün 20 iyul 2017-ci il tarixində üç il müddətinə azadlıqdan məhrum edilmiş bloqer Aleksandr Lapşini əfv edib. Azad edildikdən sonra bloqer xəstəxanaya yerləşdirilib. Hökumət orqanlarının verdiyi məlumatına görə, o intihar etməyə cəhd edib. Lapşin Bakıdakı həbsxanada baş verən bu hadisəni suiqəsdə cəhd adlandırıb. 14 sentyabr 2017-ci ildə bloqer İsrailə uçub ("Qafqaz Düyünü").
Fevralın 18-də bloqer Aleksandr Lapşin Facebook səhifəsində bildirib ki, Azərbaycanda ona qarşı iki yeni cinayət işi açılıb.
Bir ay əvvəl Rusiyanın bir təşkilatının əməkdaşları ona müraciət edərək xəbərdarlıq ediblər ki, Bakıda ona qarşı cinayət işi açılıb, Lapşin deyir. Ona deyilib ki, Azərbaycan rəhbərliyi Lapşinin Rusiya və İsraildən gələn tibbi ekspertiza nəticələri əsasında ona qarşı suiqəsd cəhdi olduğuna dair şikayətinin Avropa İnsan Haqları Məhkəməsi tərəfindən qəbul etməsindən narazıdır. Ona ehtiyatlı olmağı tövsiyə ediblər, həmçinin onu tutub saxlaya bilən və təslim edə biləcək ölkələrin siyahısını təqdim ediblər.
"Bu günlərdə Azərbaycanın planları barədə İsrail məni rəsmən xəbərdar edib. Əvvəlcə Rusiyanın adından məni xəbərdar edən şəxslərin həmkarları ilə telefonla söhbət etdim və sonra onlarla razılığa əsasən, İsrail Xarici İşlər Nazirliyindən rəsmi məktub aldım. Orada ivrit dilində yazılmışdı ki, əldə olunan məlumatlara görə, Azərbaycan mənə qarşı cinayət işini başladıb və nəzərə alın ki, mən izlənilirəm", - Lapşin deyib.
Qeyd edək ki, Aleksandr Lapşin Rusiya, Ukrayna və İsrail vətəndaşıdır. Lapşinin Azərbaycanda təqibi Dağlıq Qarabağa səfər etdiyi üçün başladılmışdı.
Azərbaycan hakimiyyəti qanunvericilkdə iki maddənin pozulduğunu bildirib: "Terrorizmə açıq çağırışlar (qanunsuz məhkum edilmiş və həbs edilmiş azərbaycanlı bloqer Mehman Hüseynovun azad edilməsinə çağırış) və dövlətə qarşı açıq çağırışlar (orada Azərbaycan hakimiyyətini korrupsiya və qanun pozuntularına yol verməkdə ittiham etdiyim barədə yazdığım məqalələrin uzun siyahısı var)", bloqer deyir.
Mart ayında Lapşin İnterpolun Fransanın Lion şəhərində yerləşən qərargahına getməyi planlaşdırır. Lapşin bildirib ki, "Orada Azərbaycanın müxalifəti təqib etmək və mətbuat azadlığına qarşı terror həyata keçirmək üçün bu hörmətli beynəlxalq qurumun alətlərindən istifadə etdiyi ilə bağlı danışacam".
Lapşinin bəyanatı ilə bağlı Azərbaycanın hüquq-mühafizə orqanlarından açıqlama verilməyib. Azərbaycanda Lapşinin təqib olunması barədə heç bir məlumat yoxdur.