Mənzil-qərargahı Yerevanda olan Qafqaz İnstitutunun direktoru Aleksandr İsgəndəryan Qarabağ münaqişəsinin hazırkı tənzimlənmə prinsiplərindən imtinanı qeyri-real hesab edir.

Xatırladaq ki, bu yaxınlarda ATƏT-in Minsk qrupunun həmsədrləri öz bəyanatlarında da Madrid prinsiplərinə istinad etmişdilər. Bu prinsiplər, başqa təfərrüatlarla yanaşı, Ermənistan tərəfindən işğal edilmiş Dağlıq Qarabağ ətrafındakı rayonların Azərbaycanın nəzarəti altına qaytarılmasını özündə ehtiva edir. Lakin son zamanlar Ermənistanda tez-tez “bir qarış da torpaq qaytarmayacağıq” kimi döyüşkən ritorika səslənir. Bu cür ritorika hakimiyyət təmsilçiləri arasında da müşahidə edilir.

“Aydındır ki. danışıqlar masasında olan elə oradadır – bu Madrid prinsipləridir və həmsədrlər bunu öz bəyanatlarında kifayət qədər aydın şəkildə bildiriblər. Geniş anlamda – müxtəlif nüanslarla, müxtəlif variantlarla, lakin dünya ictimaiyyətinin Qarabağ münaqişəsində danışmaq, yaxud da vasitəçilik etməyə hazır olduğu dil Madrid prinsipləridir”, - Aleksandr İsgəndəryan deyib.

Bununla yanaşı, politoloq qeyd edib ki, bundan nə ermənilərin. Nə də azərbaycanlıların xoşu gəlir, lakin azərbaycanlılar üçün Madrid prinsipləri ermənilərə nisbətdə daha az sərfəlidir.

“Ermənistanda liderlər zaman-zaman bildirirlər ki, Madrid prinsipləri çərçivəsində danışıqlar aparmağa hazırdırlar. Bu, ictimaiyyət tərəfindən çox pis qarşılanır, lakin onlar bunu deyirlər. Azərbaycan rəhbərliyi bunu deyə bilmir, lakin danışıqlar real olaraq Madrid prinsipləri çərçivəsində gedir”, - İsgəndəryan vurğulayıb.

Politoloq həmçinin İlham Əliyevlə Nikol Paşinyan arasında gələcək görüşdə danışıqlar prosesində hansısa irəliləyişin olacağından şübhəli olduğunu deyib.

“Tezliklə gözlənilən görüşdən maksimum olaraq daha sonrakı görüş barədə razılaşmanı gözləmək mümkündür”, - o bildirib.