20 mart 2019-cu ildə türk dilində danışan bir qrup şəxs Xankəndi şəhərini ziyarət edərək, Azərbaycanla müharibə zamanı həlak olan Qarabağ ermənilərinin abidəsi önünə çələnglər qoyub. Qonaqlar orada çıxışlar edib.

"Bizim Ermənistan" qəzetinin yayınladığı videoda görüldüyü kimi, qrupdakı şəxslərin sayı on nəfərdən çox deyil. Qonaqların abidə önündə çıxışları erməni dilinə sinxron tərcümə edilərkən, türk dilində çıxışlar qismən eşidilir və diqqətlə dinlədikdə türkçə danışan bir kişinin çıxışında "Dağlıq Qarabağ Respublikası" sözünü eşitmək olur.

"Qarabağdakı türklər Azərbaycanı faşist ölkə adlandırıb və Xankəndidəki abidəni ziyarət edərək soyqırımı yad edir. Bir qrup türkiyəli xadim erməni soyqırımı qurbanlarının və Qarabağ müharibəsində həlak olmuş əsgərlərin xatirəsini yad edib. Səhər saatlarında onlar Xankəndi Memorial Kompleksinə gələrək soyqırım qurbanlarına və həlak olmuş əsgərlərin abidəsi önünə çələng qoyublar. "Türkiyə 1915-ci ildə erməni xalqına qarşı törədilmiş soyqırımı tanımalıdır. SSRİ-nin dağılması zamanı Azərbaycan rəhbərliyi Qarabağda eyni şeyi etmək istədi", deyə türk nümayəndə heyəti bəyan edib və bu zaman türklərdən biri açıq şəkildə Azərbaycanı faşist adlandırıb. Nümayəndə heyəti "Soyqırım əleyhinə" və "Soyqırım qurbanları ilə həmrəylik" təşkilatlarının rəhbərləri və üzvlərindən ibarətdir.

Azərbaycan Xarici İşlər Nazirliyindən ətraflı məlumat əldə etmək cəhdlərimiz uğursuz oldu, onlar bayramla əlaqədar olaraq telefon zənglərinə cavab vermədi. Azərbaycan mediasında türkdilli şəxslərin Bakının icazəsi olmadan işğal olunmuş Dağlıq Qarabağa səfəri əks olunmur. Türkiyənin Bakıdakı səfirliyində suallarımızı cavablandıra bilən əməkdaş da tapa bilmədik.

Eurasia Diary Azərbaycan Xarici İşlər Nazirliyi və Türkiyə səfirliyilə əlaqə quraraq, separatçıların anti-Azərbaycan və anti-türk təbliğatı üçün istifadə etdikləri bu qəribə səfər haqqında daha ətraflı məlumat əldə etmək niyyətindədir. Biz mühakimə etməyə tələsmirik, çünki bu insanlar Türkiyə vətəndaşları və hətta türklər olmaya bilər. Amma həqiqəti öyrənib oxucularımıza mütləq məlumat verəcəyik...