Türkmənistanın paytaxtı Aşqabadda BMT-nin dəstəyi ilə “Dayanıqlı nəqliyyat sistemi üzrə Qlobal Konfrans” keçirilib. Tədbirdə BMT-nin baş katibi Pan Gi Munla yanaşı, Avstriyanın, Əfqanıstanın, Gürcüstanın, Boliviyanın və Çernoqoriyanın dövlət başçıları iştirak ediblər.
BMT-nin İqtisadi-Sosial Şurasının əsas məşvərətçi statuslu üzvü Beynəlxalq Avrasiya Mətbuat Fondu da qlobal konfransda təmsil olunub. Fondun sədri Umud Mirzəyev tədbirə qatılan xarici qonaqlarla görüşüb, bir çox beynəlxalq ekspertlərlə müzakirələr aparıb.
Görüşlərdə BAMF sədrini təşkilatın Afrika qitəsi üzrə təmsilçisi, Yeniləşən və Səmərəli Enerji üçün Ərəb Platformasının rəhbəri Dr. Kamel Esseghairi də müşayət edib. Görüşlər zamanı nəqliyyat sahəsində əməkdaşlıq əlaqələrinin inkişafı ilə bağlı bir sıra aktual məsələlər müzakirə edilib və onların həll yolları araşdırılıb.
Tədbir çərçivəsində BAMF sədri BMT-nin İqtisadi və Sosial Şurasının QHT bölməsinin rəhbəri Alberto Padova ilə də görüşüb. BMT-nin İqtisadi və Sosial Şurasının QHT bölməsinin ən yüksək statuslu üzvü olan BAMF-ın ən yüksək statuslu üzvlərin birgə şəbəkəsinin yaradılması ilə bağlı təklifini müsbət qiymətləndirən Padova bu sahədə istənilən dəstəyi göstərməyə hazır olduğunu bildirib. O, BAMF sədrinin adı çəkilən məsələ ilə əlaqədar göstərdiyi səyləri dəstəklədiyini bildirib.
U. Mirzəyev eyni zamanda, aralarında Pakistanlı vətəndaş cəmiyyəti təmsilçiləri olan nümayəndə heyəti, o cümlədən Pakistanın Limanlar və Gəmiçilik naziri Dostan Xan Jamaldini, Qvineya Respublikasının BMT-dəki konsulu Alassane Konte, BMT regional inkişaf mərkəzinin direktoru Çikako Takaşe, BMT-nin baş katibinin İqtisadi və Sosial Şurası üzrə təmsilçisi Vu Honqbo və digər qonaqlarla ətraflı müzakirələr aparıb. Görüşlərdə Azərbaycanın vətəndaş cəmiyyəti təmsilçiləri haqqında geniş məlumat verən U. Mirzəyev dünyanı narahat edən münaqişələrə də toxunub. BAMF sədri bildirib ki, bu gün dünya konfliktlər məngənəsində yaşayır. “Davam etməkdə olan və dondurulmuş münaqişələrin alovlanması davamlı inkişaf üçün başlıca təhdidlərdəndir. Qlobal kataklizmlərin geniş dağıdıcı təsiri nəinki davamlı inkişafın, eləcə də, bəşəri sülhün qorunması üçün ciddi təhlükəyə çevrilib”.
Azərbaycanın vətəndaş cəmiyyəti təmsilçilərinin belə beynəlxalq tədbirlərdə iştirakını yüksək qiymətləndirən BAMF sədri xüsusilə beynəlxalq məqsədləri olan yerli QHT-lərin BMT ilə birgə fəaliyyətinin zəruriliyindən söz açıb.
Qeyd edək ki, bu qlobal konfrans BMT-nin Baş Məclisinin səmərəli nəqliyyat və transit koridorlarının yaradılması haqqında qəbul etdiyi qətnamə əsasında baş tutur. Beynəlxalq statuslu təşkilat kimi BAMF bu tədbirə Azərbaycandan dəvət olunan yeganə qurumdur.
.JPG)
(1).JPG)
(1).JPG)
.JPG)
(1).JPG)
.JPG)
