Beynəlxalq Avrasiya Mətbuat Fondu (BAMF) martın 10-da Birləşmiş Millətlər Təşkilatının Cenevrədəki baş qərargahında Şuranın insan hüquqları üzrə 34-cü sessiyasında “Uşaqlar və silahlı münaqişələr” adlı uğurlu paralel tədbir keçirib.
"Eurasia Diary" xəbər verir ki, tədbirdə bir sıra ictimai xadim, vətəndaş cəmiyyəti təmsilçisi, BMT-nin bir sıra qurumlarının nümayəndələri və diplomatlar iştirak edib.
BAMF prezidentinin köməkçisi Anastasiya Lavrina Ermənistan-Azərbaycan Dağlıq Qarabağ münaqişəsi kontekstində müharibədən əziyyət çəkmiş uşaqlar barədə danışıb.
“Ermənistan və Azərbaycan arasında 80-ci illərin sonunda başlamış münaqişədə müharibənin mənfi təsirinə daha çox uşaqlar məruz qalıb. Azərbaycan ərazisinin 20%-i işğal edilən zaman yüz minlərlə günahsız mülki vətəndaş Ermənistanın Azərbaycana qarşı təcavüzkar işğalçı siyasətinin qurbanına çevrildi. Ermənistan silahlı qüvvələri istər uşaq və qadın olsun, istərsə də, qoca və ya kişilər olsun, heç vaxt öz qurbanları arasında fərq qoymayıblar.
Təkcə Xocalı faciəsi törədilən zaman 1992-ci ilin fevralın 25-dən 26-a keçən gecə 613 nəfər dinc əhali qətlə yetirilib. Bu insanlıq əleyhinə törədilmiş böyük cinayət idi. Xocalı şəhərində 63 uşağın öldürülməsindən savayı Azərbaycanın işğal olunmuş torpaqlarında 855 uşaq bağçası və 693 orta məktəb dağıdılıb. 2011-ci ildən bəri 10–dan çox uşaq snayperin hədəfinə tuş gəlib. Onların əksəriyyəti ölümcül yaralanıb.
Çox təəssüf ki, Ermənistanın təcavüzkar siyasətindən son zamanlar əziyyət çəkən uşaqlar barədə danışa bilmirəm. Uşaqlar hələ də problemlərlə yaşayır və mən ümid edirəm ki, nə zamansa bu məsələ beynəlxalq ictimaiyyətin, xüsusilə də Birləşmiş Millətlər Təşkilatının diqqət mərkəzində olacaq və bu da regionda stabilliyin mümkün qədər tez bərpa olunmasına kömək edəcək”, - deyə o bildirib.