Beynəlxalq Avrasiya Mətbuat Fondu (BAMF) martın 10-da Birləşmiş Millətlər Təşkilatının Cenevrədəki ofisində Şuranın insan hüquqları üzrə 34-cü sessiyasında “Uşaqlar və silahlı münaqişələr” adlı uğurlu paralel tədbir keçirib.
"Eurasia Diary" xəbər verir ki, tədbirdə çıxış edən BAMF-ın əməkdaşı Natalya Quliyeva postsovet dövrü münaqişələrinin nəticələri, xüsusilə də, Donbasda hərbi əməliyyatlardan zərər çəkmiş uşaqlar barədə danışıb.
Onun sözlərinə görə postsovet dövrü münaqişələrinə, eləcə də, bütün dünyadakı münaqişələrə vahid yanaşma sərgilənməlidir. Hər hansı münaqişə həll olunmadıqda və uzunsürən münaqişəyə çevriləndə bu yeni münaqişələrin yaranmasına səbəb olur.
Hərbi münaqişələrdə mənfi təsirə ən çox məruz qalanların uşaqlar və qadınlar olduğunu bildirən Natalya Quliyeva deyib ki, Ukrayna ərazisində Donbasın müvəqqəti olaraq nəzarətsiz hissələrində artıq dördüncü ildir ki, müharibə gedir.
UNİCEF-in məlumatına görə, 1 milyon uşaq təxirəsalınmaz humanitar yardıma ehtiyac duyur – bu isə keçən ilə nisbətən iki dəfə çoxdur.
“Bu artım hərbi əməliyyatların davamlı xarakter alması və Ukraynanın digər bölgələrindən təxminən 1,7 milyon insanın məcburi şəkildə köçdüyü və gəlir mənbəyi olmayan əksər ailələrin yaşadığı Luqansk və Donetsk vilayətlərində həyat şərtlərinin pisləşməsidir.
Beynəlxalq təşkilatların münaqişə barədə istənilən qərar verərkən uşaqların təhlükəsizliyinin təmin edilməsi əsas faktor kimi nəzərə alınmalıdır. Uşaqların marağından daha vacib maraq ola bilməz, xüsusilə də, həyati təhlükəli şərtlər daxilində.”