Mətbuat Şurası və Beynəlxalq Avrasia Mətbuat Fondunun (BAMF) birgə təşəbbüsü ilə Bakı Dövlət Universitetinin (BDU) bir qrup müəllim heyəti, o cümlədən tanınmış jurnalistlər və media təmsilçiləri, eyni zamanda ictimai xadimlərin cəbhə bölgəsinə səfəri baş tutub. Səfər çərçivəsində nümayəndə heyəti ilk olaraq Füzuli rayonunun Horadiz qəsəbəsində Aprel hadisələri zamanı şəhid olmuş Azərbaycan əsgərlərinin xatirəsinə ucaldılan abidəni ziyarət ediblər. Daha sonra nümayəndə heyəti Cəbrayıl rayonunun Cocuq Mərcanlı kəndini ziyarət edib. Kənddəki sosial obyektlərlə tanış olublar.Kənddə yeni tikilən və yeni tədris ilində artıq istifadəyə verilən məktəbin önündə çıxış edən, millət vəkili, MŞ-nın sədri Əflatun Amaşov ötən ilin aprelində Azərbaycan ordusunun uğurlu döyüş əməliyyatlarından sonra öz normal həyat məcrasına qayıdan Cocuq Mərcanlıda bu gün ölkə Prezidentinin bilavasitə diqqəti və nəzarəti ilə salınan yaşayış massivinin, infrastrukturun həm də Qarabağa qayıdışın bir əlaməti olduğunu qeyd edib. Kənd sakinlərinə müjdə verən MŞ-nın sədri yaxın gələcəkdə Şuranın Beynəlxalq Avrasiya Mətbuat Fondu ilə birgə Cocuq Mərcanlıda Media Mərkəzinin yaradılmasını nəzərdən keçirdiklərini bildirib: “Biz istəyirik ki, bu bölgəyə, bu kəndə gələn yerli və xarici qonaqlar, jurnalistlər məlumatları vahid mərkəzdən alsınlar. Bu mərkəz hər cür vasitələrlə təmin olunsun”. Millət vəkili Aqil Abbas isə Cocuq Mərcanlı məktəbinin bütün müəllim-şagird heyətinin ön cəbhənin əsgərləri olduğunu söyləyib: “O yüksəkliklərdə sizi qoruyan əsgərlərimiz sizi yanlarında gördükləri üçün daha əzmli, daha güclü olurlar. ” BDU-nun professoru Cahangir Məmmədli isə bu gün məktəbdə şagird kimi təhsil alan uşaqların hamısını tələbə kimi universitetdə gözlədiyini bildirdi. Qeyd etdi ki, bu məktəbdə oxumaq, bu kənddə yaşamaq qədər fədakarlıq nümunəsidir. Səfərin təşkilatçısı olan Beynəlxalq Avrasiya Mətbuat Fondunun (BAMF) prezidenti, MŞ-nın sədr müavini Umud Mirzəyev Cocuq Mərcanlıya vaxtaşırı belə səfərlərin təşkil olunmasının vacib əhəmiyyət daşıdığını bildirdi. O, qeyd etdi ki, tanınmış ziyalıların gəlişi məktəbin gələcək fəaliyyətinə öz müsbət təsirini göstərəcək. Cocuq Mərcanlının ölkə başçısının sərəncamı ilə ən qısa zamanda yüksək səviyyəli yaşayış məntəqəsinə çevrildiyini bildirən cənab Mirzəyev, insanların böyük fərəh hissi ilə öz doğma yurd yuvalarına qayıtdıqlarını bildirib. "Arzu edirəm ki, ən qısa vaxtda prezident tərəfindən oxşar sərəncam işğal altında olan digər bölgələrimiz, o cümlədən mənim doğulub boya-başa çatdığım, bir hissəsi hələ də işğal altında olan Füzulinin Aşağı Əbdürrəhmanlı kəndi barəsində də verilsin." Məktəblilər qarşısında çıxış edən BDU-nun Professoru, filologiya elmləri doktoru Nəsir Əhmədli, BDU-nun Televiziya və radio jurnalistikası kafedrasının müdiri, filologiya üzrə elmlər doktoru Allahverdi Məmmədli, media rəhbərləri Mətbuat Şurası idarə heyətinin üzvü, "Şərq" qəzetinin baş redaktoru Akif Aşırlı, “Xalq Cəbhəsi” qəzetinin baş redaktoru Elçin Mirzəbəyli, “İki sahil” qəzetinin Baş redaktorun I-ci müavini İsmayıl Hacıyev, “Region+” jurnalının baş redaktoru Namiq Mayılov, “Türküstan” qəzetinin baş redaktoru Aqil Camal və nümayəndə heyətinin digər üzvəri məktəbin kollektivinə öz arzu və istəklərini çatdırıblar. Cocuq Mərcanlıdakı məktəblə tanış olan nümayəndə heyəti ora bir çox kitablar hədiyyə edib. Həmin kitablardan bəziləri nümayəndə heyətinin tərkibində olan müəlliflər tərəfindən yazılıb və məktəbin müəllim və şagird heyətinə təqdim olunub. Səfər zamanı nümayəndə heyəti Füzuli rayonunun Aşağı Əbdürrəhmanlı kəndini də ziyarət edərək burada erməni təcavüzkarları tərəfindən vandalizmə məruz qalmış, xarabalığa çevrilmiş ərazilərə, o cümlədən kəndin qəbristanlığına baş çəkdilər. Təəssüf ki, bu qəbristanlıqda çoxlu sayda qəbirlər erməni ordusunun əsgərləri tərəfindən tanınmaz hala salınıb və qəbrüstü baş daşları güllələnib. BAMF sədrinin ötən il dünyasını dəyişən atası da məhz bu kəndin Azərbaycan əsgərlərinin nəzarətində olan hissəsində yerləşən bu qəbristanlıqda torpağa tapşırılıb. Səfər çərçivəsində nümayəndə heyəti eyni zamanda Füzuli və Cəbrayıl rayonunda yerləşən N saylı hərbi hissələri ziyarət edərək əsgər, zabit və yüksək çinli hərbçilərimizlə görüşüb, onlarla birgə nahar edib və fikir mübadiləsi aparıblar.
BAMF-ın mətbuat xidməti
