Beynəlxalq Avrasiya Mətbuat Fondunun (BAMF) prezidenti Umud Mirzəyev Azərbaycanın yeni baş naziri Novruz Məmmədovu təbrik edib.
Təbrikdə deyilir:
"Çoxları Novruz Məmmədovun baş nazir postuna təyinatını gözləmədiklərini dilə gətirsə də, mən isə məhz bu görəvdə belə bir namizədin olacağını düşünürdüm. Novruz Məmmədovun dövlət idarəçiliyindəki təcrübəsi, beynəlxalq sahədə fəaliyyəti, proseslərə dərindən bələd olması, ən əsası isə ötən illər ərzində qazanmış olduğu etibarlılıq bu fikrə gəlməyimə əsas idi. O, uzun illərdir ki, hökumətin yüksək eşalonunda təmsil olunurdu və beynəlxalq əlaqələrin yönəldilməsində aparıcı şəxslərdən idi. Bu gün beynəlxalq əlaqələri nəzərə almadan uğurlu iqtisadi münasibətlərin və ölkənin hərtərəfli inkişafı üçün kompleks yanaşmanı təsəvvür etmək çətindir. O, Dağlıq Qarabağ münaqişəsinin həlli istiqamətində aparılan demək olar ki, bütün danışıqların canlı şahididir və prosesi mükəmməl bilir. Bu baxımdan da, Novruz müəllimin bu posta təyinatını uğurlu seçim hesab edirəm. Təbrik edir və gələcək fəaliyyətində uğurlar arzulayıram!"