Azərbaycan Qeyri Hökumət Təşkilatları özünəməxsus inkişaf yolu keçmişdir. 90-cı illərin əvvəllərindən yaranmağa başlayan qeyri hökumət təşkilatları Azərbaycanın ən çətin günlərində ölkənin ictimai-siyasi həyatında önəmli yer tutmağa başladı. Zaman keçdikcə bəzi QHT-lər sözün əsl mənasında vətəndaş cəmiyyətinin inkişafı, vətəndaş təəssübkeşliyinin təşviqi, müharibənin ağrı acılarının aradan qaldırılması və ölkəmizin haqq səsinin dünyaya çatdırılması, eləcə də beynəlxalq tərəfdaşlıq imkanlarının gücləndirilməsi, istiqamətlərində cəmiyyətin aparıcı qurumlarına çevrilməyə başladı. QHT vətəndaş cəmiyyətinin ən önəmli institutudur. 90-cı illərin sonlarında yaradılmış QHT Forumu isə vətəndaş cəmiyyətinin problemlərinin öyrənilməsi, ümum QHT ailəsinin yaradılması baxımından əhəmiyyətli addım oldu. 2001-ci il QHT həyatında yeni mərhələnin başlanğıcı oldu. Həmin il ölkəmizdə QHT fəaliyyətinə dair ayrıca qanun layihəsi qəbul olundu və vətəndaş cəmiyyəti qurumlarının cəmiyyətdəki rolu hüquqi cəhətdən təsbitini tapdı. Azərbaycan Respublikası Prezidentinin sərəncamı ilə təsdiq edilmiş Azərbaycan Respublikasının qeyri-hökumət təşkilatlarına dövlət dəstəyi Konsepsiyasının qəbulu isə ölkədə bu istiqamətdə ərsəyə gətirilən fundamental sənəd oldu. Bu sənədin qəbulu QHT inkişafının yeni mərhələsinin başlanması üçün baza prinsiplərini müəyyənləşdirdi. Konsepsiyadan irəli gələn vəzifələrin yerinə yetirilməsi üçün Azərbaycan Respublikası Prezidentinin 13 dekabr 2007-ci il tarixli 674 nömrəli Fərmanı ilə isə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası yaradıldı. QHT nümayəndələri arasında aparılmış şəffaf seçkilərdən sonra dövlət başçısının 2008-ci il tarixli sərəncamı ilə 11 nəfərdən ibarət Şura üzvləri təyin edildi və Şura sədri seçildi.
Bu günlər 10 illik yubileyini qeyd etdiyimiz QHT Şurası qısa zaman kəsiyində ölkəmizdə ictimai birlik fəlsəfəsinin gücləndirilməsi, QHT fəaliyyətinin əhəmiyyətinin artırılması dövlət və qeyri hökumət təşkilatları arasında münasibətlərin inkişaf etdirilməsində, ən müxtəlif istiqamətlərdə həyata keçirilən proqramların dəstəklənməsində böyük işlərə imza atdı. Peşəkar kadr potensialının formalaşdırılması, QHT fəaliyyətinin stimullaşdırılması üçün müasir texnologiyaların tətbiqi, şəffaf və müxtəlif fikirlilik şəraitində qərarların qəbul olunması, beynəlxalq layihələrin icrası Şuranın ölkəmizə ən böyük töhvəsi oldu. Şura ətrafında formalaşmış peşəkar komanda, Şuranın katibliyi, qurumun işində yaxından iştirak edən vətəndaş cəmiyyəti nümayəndələri QHT platformasının, bilik və bacarıqlarının artırılması üçün səmərəli fəaliyyət göstərir.
Bu gün ölkədə vətəndaş cəmiyyəti institutlarının fəallığı, əməkdaşlıq imkanlarının inkişaf etdirilməsi, ictimai nəzarətin təşkilində QHT-lərin rolu artmaqdadır. Bu kontekstdə Qeyri-Hökumət Təşkilatlarına Dövlət Dəstəyi Şurası çox uğurlu bir fotmatdır. Bu format ötən 10 ildə özünün fəaliyyətli ilə bir daha onu nümayiş etdirir ki, Azərbaycanda bütün istiqamətlərdə dayanıqlı inkişafa töhfə verməkdə Şuranın fəaliyyəti davam edir və Prezidentin apardığı siyasətdə milli maraqları təmin edir. Ölkəmizdə QHT sektorunun inkişaf etdirilməsi və səmərəliliyin artırılması dövlət siyasətinin nəticəsidir. Bu işdə Prezidentin ictimai-siyasi şöbəsinin, Şura katibliyinin, Şura əməkdaşlarının xüsusi rolu vardır. O, baxımdan vətəndaş cəmiyyəti üçün önəmli, 10 illiyi qeyd olunan QHT Şurasının yubileyi günündə bütün vətəndaş cəmiyyəti nümayəndələrini, Prezidentin ictimai-siyasi məsələlər üzrə köməkçisi Əli Həsənovu, QHT Şurasının sədri Azay Quliyevi, Şuranın katibi Fərasət Qurbanovu, Şura katibliyinin bütün işçilərini və qurumun böyüyüb inkişaf etməsində əməyi olan hər kəsi səmimi qəlbdən təbrik edirəm.
Umud Mirzəyev
Beynəlxalq Avrasiya Mətbuat Fondunun prezidenti
