Eurasia Diary-nin verdiyi xəbərə görə, Azərbaycan Respublikası prezidenti İlham Əliyevin 13 noyabr tarixli sərəncamı ilə Azərbaycanda geologiya və geofizika elminin inkişafında xidmətlərinə görə Beynəlxalq Avrasiya Mətbuat Fondunun Müşahidə Şurasının sədri, fizika-riyaziyyat elmləri doktoru Hətəm Hidayət oğlu Quliyev əməkdar elm xadimi fəxri adına layiq görülüb. Bu münasibətlə BAMF-ın kollektivi adından Hətəm Quliyevi təbrik edir, ona elmin yüksək zirvələrində yeni-yeni nailiyyətlər arzu edirik.
Xatırladaq ki, Beynəlxalq geofizika İttifaqının Azərbaycan bölməsinin vitse prezidenti, Amerika neftçi mühəndislər cəmiyyətinin, İqtisadi Geologiya üzrə Beynəlxalq İttifaqın, Azərbaycan geoloqlarının və geofiziklərinin milli komitələrinin, Oksford akademiyasının üzvü olan görkəmli alim Hətəm Quliyevin rəhbərliyi və bilavasitə iştirakı ilə dünyanın aparıcı neft şirkətlərinin (AMOKO, BP, SHEVRON) və bir sıra respublika təşkilatlarının (ARDNŞ, Respublika Seysmoloji Xidmət Mərkəzi, SHIRVAN OIL, ANSHAD PETROL) sifarişi ilə mühüm elmi-texniki layihələr həyata keçirilib. O, Ukrayna Elmi Texniki Mərkəzinin (Avropa İttifaqının maliyyə himayəsi ilə) və ARDNŞ-in Elm Fondu layihələrinin rəhbəri olub.
Onun əsas elmi nəticələrinə Yerin təkamülünün qeyri-dayanıqsızlıq konsepsiyasının yaradılması, bu təkamülün öyrənilməsi üçün qeyri-klassik xəttiləşdirilmiş yanaşmanın işlənib-hazırlanması, Yer təkinin struktur inkişafının riyazi-geodinamik modelinin nəzəri əsasları, Yer təkində qırışların və yarıqların əmələ gəlməsi mexanizmləri və onların üçölçülü qeyri-klassik nəzəriyyəsi, Yer təkində mühitin sıxlığının dərinlik üzrə paylanmasının tam qeyri-xətti məsələsinin dəqiq həlli, bu həllin müxtəlif süxurlar üçün dayanıqsız olduğunun isbatı, sıxlıqdan asılı olaraq deformasiya proseslərinin və faza keçidlərinin baş vermə ardıcıllıqları probleminin həlli, çoxkomponentli və üçölçülü seysmik dalğaların qeyri-xətti nəzəriyyəsi, seysmikanın qeyri-klassik nəzəri baza modelinin yaradılması, Yer təkini təşkil edən süxurların dağılmasının dayanıqsızlıq konsepsiyası, quyu ətrafında, geoloji kəsilişin üst qatlarında və daxili strukturasında dayanıqlıq vəziyyətinin itirilməsinin üçölçülü riyazi nəzəriyyəsi, deformasiyaya uğrayan bərk cismlərin dayanıqlığı, möhkəmliyi, dinamikası və dağılması mexanikası üzrə qeyri-xətti məsələlərin həlli və bir sıra digər elmi istiqamətlər üzrə mühüm işlər daxildir.
