Bu gün BAMF-ın ofisində Bakı Beynəlxalq Tələbə Klubunun hazırkı rəhbərliyi və idarə heyətinin üzvləri təşkilatın qurucusu Aysəba Mirzəyeva ilə görüş keçirmişlər. Qeyd edək ki, hazırda Əlcəzirə TV nin əməkdaşı olan Aysəba xanım fəal şəkildə BBTK-nın fəaliyyətlərini dəstəkləyir. Bu günki görüşdə yeni idarə heyəti üzvləri və onların qarşıdakı il üçün hazırladıqları fəaliyyət planı ilə tanışlıq oldu. Görüşdə maraqlı müzakirələr aparıldı və təkliflər həyata keçirilməsi üçün qeydə alındı. Eyni zamanda BBTK nin Azərbaycan Gənclər Fondunun dəstəyi ilə həyata keçirəcəyi “Azərbaycanda Əcnəbi Tələbə Gənclərin III Ümumrespublika Forumu” layihəsinə də start verildi. Üç ay müddətində icra olunacaq layihənin hazırlıq işlərinə başlanıldı və Forumu yüksək səviyyədə həyata keçirmək üçün təşkilat komitəsi yaradıldı. Layihənin fəaliyyət planına əsasən hazırlıq işləri fəal şəkildə davam etdiriləcək, rəsmi icazə məktubları hazırlanaraq aidiyyatı qurumlara göndəriləcək və əcnəbi tələbələrlə görüşlər təşkil edilərək onların Foruma qatılaraq panel müzakirələrində fəal iştirak etmələri dəstəklənəcəkdir. Məlumat üçün bildirək ki, Forumun keçirilməsinin əsas məqsədi Azərbaycanda təhsil alan əcnəbi tələbələrin vahid şəbəkəsini yaradaraq BBTK nın platformasında onları daha da möhkəmləndirmək, Azərbaycan həqiqətlərinin, mədəniyyətinin, tarixinin və turizm imkanlarının xüsusilə Qarabağla bağlı obyektiv məlumatın dünya ictimaiyyətinin diqqətinə çatdırılmasında əcnəbi tələbələrin fəaliyyətini istiqamətləndirmək və onların təşəbbüslərinə dəstək vermək, həmçinin onların problemlərinin həllinə yardımçı olmaqdır.
Qeyd edək ki, BBTK 2006-cı ilin sonunda Beynəlxalq Avrasiya Mətbuat Fondunun (BAMF) və könüllülər qrupunun dəstəyi ilə yaradılmışdır. BBTK -nın məqsədi hökumətlərarası mədəni və mənəvi dəyərlərin inteqrasiyası ilə bağlı fəaliyyətlər və layihələr həyata keçirmək, ölkəmizin sosial-iqtisadi inkişafına yardım etmək, qloballaşmış bir dünyada terrora qarşı mübarizəyə qoşulmaq və Azərbaycana gələn xarici gənclərin tələbəlik dövründə rastlaşdığı çətinlikləri aradan qaldırılmasına kömək etməkdir.
BBTK İctimaiyyətlə əlaqələr departamenti.