Pakistanın Dispatch News Desk (DND) xəbər agentliyinin saytında "20 Yanvar" ilə əlaqədar məqalə yayımlanıb.

Eurasia Diary xəbər verir ki, məqalədə Azərbaycanın müstəqillik uğrunda mübarizəsi işıqlandırılıb. Məqalədə yalnız Yanvar faciəsi deyil, Dağlıq Qarabağ münaqişəsinin və torpaqlarımızın Ermənistan tərəfindən işğal olunmasına da toxunulub.

Məqalədə münaqişənin nəticələri və mövcud vəziyyəti əks olunub: “Münaqişə insanların evlərindən didərgin düşməsi və bir çox günahsız insanların ölümü ilə nəticələnib. Ermənistan BMT Təhlükəsizlik Şurası tərəfindən qəbul edilmiş dörd (822, 853, 874 və 884) qətnaməyə məhəl qoymayaraq, işğalçı siyasətindən əl çəkmir”.

Yazıda həmçinin bildirilir ki, Prezident İlham Əliyevin rəhbərliyi ilə Azərbaycan hakimiyyəti Ermənistanla olan problemin həlli üçün çox ciddi səy göstərir: “Yaxın günlərdə Azərbaycan və Ermənistan xarici işlər nazirləri Parisdə görüşüb, məsələni müzakirə ediblər. Azərbaycan  BMT-nin Minsk Qrupu və Minsk razılaşmasına əsasən münaqişənin sülh yolu ilə həll olunmasını istəyir”.

Məqalədə Pakistanın Dağlıq Qarabağ münaqişəsində Azərbaycanın haqlı mövqeyini dəstəkləməsinə geniş yer verilib.