Bu il Avroviziya-2019 mahnı müsabiqəsi 14, 16, 18 May tarixlərində İsrailin paytaxtı Tel-Əviv şəhərində keçiriləcək. 

Netta Barzilainin "Toy" mahnısı ilə qalib olan İsrail yarışmaya ciddi hazırlaşır. Mahnı müsabiqəsi Tel-Əviv şəhərinin şimalında yerləşən Tel-Əviv expo-centerdə keçiriləcək. 

Başlanma tarixinə bir aydan bir qədər çox müddət qalsa da artıq Avroviziya-2019-da qalibləri, birinci və ikinci yarımfinallardan finala kimlər vəsiqə qazanacağını müəyyən etmək üçün dünya mərc saytlarında fəal oyunlar davam edir. 

Başda BET365, COOLBET, UNİBET kimi saytlar olmaqla 10-a yaxın sayt pullu mərc oyunları təşkil edir. Hər bir sayt mərc məbləğini özü müəyyənləşdirir. Bu məbləğ minimum 30 avro olub, maksimum 100-300 avro arasında dəyişir. Bu mərc oyununa pul qoyan hər bir şəxs mərc növünə uyğun məbləğdə qazanc əldə edir. 

18 yaş üzəri istənilən şəxs bu mərc oyunlarında iştirak etmək hüququna malikdir. 

Azərbaycanda da Avroviziya fanları arasında bu cür səsvermələrdə iştirak edənlər var. Nəzərə alsaq ki, bu il ölkəmizi təmsil edəcək Çingiz Mustafayev çıxış edəcəyi ikinci yarımfinalın favoriti hesab olunur, bu amil ölkəmizi dəstəkləyənləri daha da həvəsləndirir. Hal-hazırda "Eurovisionworld" saytında paylaşılan mərc cədvəlində iki yarımfinaldan keçəçək ölkələrin adı və qalib gələ biləcək ölkələrin adları, neçənci yerə çıxa biləcəkləri haqqında məlumatlar yerləşdirilir. Bu sorğular mərc prosesində iştirakın fəallığına əsasən daima yenilənir.

Azərbaycanın şansları bukmeykerlər tərəfindən yarımfinalda yüksək, finalda isə orta səviyyədə qiymətləndirilir.        

Bununla belə bu göstəricilər müvəqqətidir və şərti xarakter daşıyır. 

Azad Nuriyev