Bir neçə gündür erməni ictimaiyyəti şok vəziyyətdədir. Müdafiə nazirinin keçmiş müavini, Ermənistanın sözdə milli qəhrəmanı Manvel Qriqoryanın cinayət işində yeni təfərrüatlar ortaya çıxdı.
Hekayə həqiqətən də dəhşətlidir. Söhbət təkcə Ermənistan deyil, bütün Qafqaz regionunun tarixində ifşa olunmuş ən böyük və utancverici korrupsiya halıdır. Və hətta məsələ oğurluğun miqyasında deyil, Manvel Qriqoryanın bütün mənəvi prinsiplərdən məhrum olmasıdır. Vicdan, şərəf, mərhəmət, təəssüf hissi və nəhayət ağıl kimi insana xas olan keyfiyyətlərin olmaması erməni xalqının şoka düşməsinə səbəb oldu. Ermənistan abırsızlığın təzahürü və acı həqiqətlə üzləşdi.
Ermənistan KİV-in məlumatına görə, erməni uşaqların ünvana yetişməyən məktubları Ermənistanın və Ermənistan ordusunun tarixinin bir hissəsi olacaq.
"Məsələ yalnız hüquqi tərəfdən ibarət deyil. Və yalnız Qriqoryanın deputat, siyasi qüvvənin nümayəndəsi və Yerkrap könüllülərinin İttifaqı kimi önəmli təşkilatın rəhbəri olduğu üçün də deyil.
Məsələ burasındadır ki, Manvel Qriqoryan - öz avtoparkı, mülkiyyət hüququna dair dəlilləri, villaları, əmlakı, "heyvanxana"sı ilə - Ermənistanda nəticə etibarilə qətllərin baş verdiyi bir siyasətin məhsuludur", lragir.am saytı yazır.
Ermənistan Milli Təhlükəsizlik Xidmətinin uşaqların ön cəbhədəki erməni əsgərlərinə göndərdiyi məktubların və bağlamaların Manvel Qriqoryanın villasında tapılmasını nümayiş etdirən videomaterialı erməni cəmiyyətini şoka saldı.
Qutulardakı məktubların məzmunundan belə aydın olur ki, onlar hələ 2016-cı il Aprel döyüşləri zamanı ön cəbhədə olan əsgərlərə yardım məqsədilə göndəriliblər. Məktəb şagirdlərinin əsgərlər üçün yığdıqları əsgər köynəkləri, corabları, dərmanlar, bintlər, sarğılar, həblər, qida məhsulları və s. digər şeylər "möcüzəvi" şəkildə M. Qriqoryana məxsus Aknaliçsk istirahət zonasında peyda olublar.
Milli Məclisin deputatının evində pələnglərin, ayıların, dəvəquşularının yaşadığı şəxsi zoopark və həmçinin ippodrom var. "Əldə olunan məlumatlara əsasən, Manvel Qriqoryan dörd günlük aprel döyüşlərinin iştirakçısı olmuş əsgərlər üçün nəzərdə tutulan ərzağın şəxsi zooparkındakı heyvanların yemlənməsi üçün istifadə etdiyi aydın oldu.
"Manvel Qriqoryanın sahib olduğu istirahət sahəsi silah anbarı və onlarla retro və müasir avtomobillərin olduğu avtomobil parkına çevrilib". Ərzaq, gigiyena və dərman vasitələri, üzərində "əsgər üçün" qeydi yazılmış hərbi formalar üçün anbar kimi xidmət edib", - Ermənistanın Milli Təhlükəsizlik Xidmətinin mətbuat mərkəzi xəbər verir.
Həmçinin axtarış zamanı PG-7 tipli 18 tank əleyhinə minaatan; 20 ədəd "F-1" tipli bomba; müxtəlif çaplı 21 589 ədəd patron; TNT 12 400 qramlıq partlayıcı maddə; 27 ədəd "KD" tipli partlayıcı maddə; 2 pulemyot gövdəsi və bir sıra digər döyüş sursatları müsadirə edilib. Manvel Qriqoryana məxsus malikanədən zavod nömrələri olan 79 tüfəng; zavod nömrələri olan 39 tapança; müxtəlif kalibrli 12 300 ədəd patron müsadirə olundu.
Həmçinin, müasir bahalı avtomobillər, motosikllər və qar motosikletləri ilə yanaşı, dörd günlük müharibə günlərində ordu üçün nəzərdə tutulan bir sıra avtomobil və təcili yardım maşını aşkar edilib.
Bundan başqa, Manvel Qriqoryan Xocalı soyqırımında, Azərbaycanın Füzuli və Cəbrayıl rayonlarında işğal olunmasında, əsirlərə işgəncə verilməsi və digər hərbi cinayətlərdə iştirak edib.
Xarici İşlər Nazirliyi Mətbuat Xidmətinin rəhbəri Hikmət Hacıyev bildirib ki, 2014-ci ilin noyabrında M.Qriqoryan "Azadlıq Radiosu"na verdiyi müsahibəsində Qarabağ uğrunda gedən döyüşlərdə yüzlərlə azərbaycanlı əsirlərin ancaq bir qismini ermənilərlə dəyişdirdiyini, çox hissəsini isə öz şəxsi evində qul kimi istifadə etdiyini qürurla demişdi. Bu etirafına görə onu hətta erməni hüquq müdafiəçiləri də tənqid etmişdilər. Bu tip əməllərin Cenevrə Konvensiyasını pozduğuna cavab olaraq isə, Manvel Qriqoryan hər hansı konvensiyanı tanımadığını və erməni olduğu üçün fəxr etdiyini deyib.
İndi isə Manvel Qriqoryan Ermənistanın tarixinə ən biyabırçı, vicdansız və rüşvətxor şəxs kimi daxil olduğu üçün fəxr edə bilər.
Hüseyn Səfərov