Türkiyədə yeni sistemin ilk günü və yeni nazirlər kabinetinin təqdimatı oldu. Alınan qərarlara və yeni nazir seçimlərinə baxdıqda, Ərdoğanın daha çox siyasətdən kənar və potensiyallı simalarla mövcud sistem boşluqlarının həllini düşündüyünü və məhz buna görə də kabinetin 95%-nin yeni simalardan təşkil olunduğunu görmək mümkündür. Burada qeyd etmək lazımdır ki, Türkiyə bu cəhətdən Kanada sistemini əsas götürmüş ancaq özünküləşdirmiş bir model həyata keçirmişdir.

Dəyişmədiyi nazirləri məhz bu səbəblərə xidmət edir.

1) Süleyman Soylu, daxildə güclü oturuşmuş sistemə sahibdir. Xüsusilə xalqın içindən çıxması və terrorla mübarizəsinə görə AKP üçün daha çox dəstək toplaya bilir. Bununla yanaşı Ərdoğanın kürəkəni Berat Albayrak-la mübahisəsi olmuş və müxalifət qanadından "Ərdoğan diktatordursa məhz kürəkənin rəqibini uzaqlaşdıracaq"deyilmişdi. Ancaq bunun əksinə Ərdoğan onları barışdırmış və yeni kabinetdə Soylunu saxlamışdır. Beləliklə daxili siyasətdə sabitlik olduğu kimi davam edəcək.

2) Berat Albayrak, daha çox Ekologiya və Təbii sərvətlər naziri olaraq, Türkiyə üçün gənc və yeni nəfəs olmuş və böyük energetik danışıqların həllində aktiv şəkildə çalışmış gənc kadrdır. Qərara görə o , Türkiyənin yeni "Xəzinə və Maliyyə nazirliyinə" rəhbərlik edəcək. Məncə bu Albayraka Ərdoğan tərəfdən cızılmış yoldur. Məhz Ərdoğan Albayraka ilk enerji sahəsində işləmə imkanı verərək hər hansı FETÖ təxribatının olmamasını təmin etdi. Yeni qərarı ilə isə artıq ölkənin maliyyə və xəzinəsini bu təhlükədən müdafiə etmiş oldu. Ərdoğan hər gün yüksələn dollardan narazı və müdaxilə edə bilmədiyindən şikayətçi idi. Yeni qərarla aktiv şəkildə müdaxilə edə biləcək.

3) Hülusi Akar, 15 iyul hadisələri zamanı düşmən mövqeyinə keçmədən mübarizə apararaq, dövlətin prezidentin yanında olduğunu göstərərək, anti-FETÖ əməliyyatlarına qarşı Suleyman Soyluya dəstək vermiş, ordu daxili sabitlik yaradaraq, Fərat Qalxanı, Afrin əməliyyatı və Qandil əməliyyatlarında Türkiyə ordusunun tam dəqiqliklə mübarizə aparmasını təmin edərək xalq tərəfdən dəstəklənmişdir. Bunu bilən və daha çox ordunun güclü olmasını istəyən Ərdoğan Hülusi Akarı yeni postla kabinetə əlavə edib.

4) Mövlüd Çavışoğlu, Türkiyənin xarici işlərində aktiv şəkildə Ərdoğanın maraqlarına cavab verən xarizmatik diplomatdır. Çavuşoğlu hökümətin ən kritik görüşlərində iştirak etmiş və böyük əməliyyatların keçirilməsi üçün diplomatik zəmin yaratmışdır. Məhz bu halın olması həm hakimiyyət həm də Ərdoğan üçün itirilməz nemətdir.

Fikrimcə, hələ də ədalət sistemində və iqtisadiyyatda problemlər var. Yeni sistemsə bu problemin həllinə maksimum kömək edəcək.

Qərbi Kaspi Universitetinin Tətbiqi Politologiya Mərkəzinin eksperti Yadigar Nağıyev