Məlum olduğu kimi, Azərbaycan əsilli tanınmış Moskvalı hüquqşünas Elman Paşayev vəkil statusundan məhrum edilərək iki ay müddətinə həbs olunub. O, xüsusilə böyük ölçüdə əmlak almaq məqsədilə qəsb etmə (Cinayət Məcəlləsinin 163-cü maddəsinin 3-cü bəndi) ilə ittiham olunur. Müvafiq qərar Moskva vilayətindəki Mıtişinski Şəhər Məhkəməsi tərəfindən qəbul edilib.
Paşayevə qarşı cinayət işi təxribata bənzəyir. Məsələ burasındadır ki, yüksək titullara malik hüquqşünas o cümlədən azərbaycanlıların qanuni maraqlarını Rusiyada müdafiə edir. Sonuncu belə işlərdən biri erməni terrorizmindən bəhs edən "XX əsrdə transmilli terrorizmin tarixi" kitabını nəşr etdirdiyi üçün rus tarixçisi Oleq Kuznetsovu müdafiə etmək olub. Vəkilin aktiv siyasi fəaliyyəti və məhz "Çestno" partiyanın birinci sədri vəzifəsinə təyin olunması ona qarşı aparılan kampaniya üçün katalizator rolunu oynadı.
Rusiyada nüfuzlu erməni lobbisinin olması nəzərə alınarsa, Paşayevə qarşı iddianın əvvəlcədən hazırlanmış olduğunu düşünmək çətin deyil. Bunu vəkil və siyasətçinin dərhal həbsi və cinayətə cəlb olunması sübut edir. Axı hökm çıxarılana qədər ölkəni tərk etməmək barədə yazılı bildiriş verməsi kifayət edə bilərdi. Güman edilir ki, bu şəkildə Paşayevi öz əhatəsindən təcrid ediblər.
Bakıda olan rus tarixçisi Oleq Kuznetsov Paşayevə qarşı qaldırılmış iş barədə öyrənib. Tarixçi Eurasia Dairy-ə verdiyi şərhində vəkilin həbsinin onu müdafiə etdiyi üçün intiqam olduğu fikrini irəli sürüb. Xatırladaq ki, Kuznetsovun erməni terrorizmi ilə bağlı monoqrafiyası təhqiqat işinin obyekti idi. Tarixçi özü etnik qarşıdurma yaratmaqda ittiham olunurdu.
"Çox xoşagəlməz bir haldır ki, mənim elmi fəaliyyətimə hörmətsizlik cəhdləri şəxsən mənim təqib olunmağımın hüdudlarını aşıb. Mənə yaxın olan, bu və ya başqa şəkildə tarixi və hüquqi həqiqətin müdafiəsi ilə əlaqəli şəxslər zərər çəkirlər. Ümid edirəm ki, Rusiya ədalət məhkəməsi mənə münasibətdə olduğu kimi ədalətli olacaq".
O qeyd etdi ki, Rusiya təcrübəsində qəsb etmə asanlıqla irəli sürülən, lakin çox çətin sübut olunan maddədir.
"Qəsb etmənin əsas fərqləndirici əlaməti pul və digər əmlakı qəsb edərkən zorakılığın tətbiqi və ya zorakılıqla təhdid olunmadır. Paşayevin məsələsində heç bir zorakılıq halı yox idi. Dəlil olaraq səs yazısı var. Buna görə də əminliklə bildirirəm ki, işin qəsb etmə kimi təqdim olunması həqiqətə uyğun deyil", - deyə Kuznetsov bildirib.
Oleq Kuznetsovun sözlərinə görə, Elman Paşayev bu cür qanun pozuntusuna yol verməyəcək zəngin hüquqi təcrübəyə malik insandır. O, bu vəziyyətin Paşayevə qarşı əvvəlcədən hazırlandığına əmindir. Kuznetsov Elman Paşayevin ona qarşı irəli sürülən ittihamlardan şərəflə çıxacağına ümid etdiyini bildirib.
Natalya Quliyeva