Yaşadıqları evlərin sənəd problemi bir çox ölkə vətəndaşının ciddi narahatçılıöına səbəb olurdu. Bu evlərin alqı-satqısı və digər məsələlərdə problem yaradırdı. 18 Fevral tarixində Prezident İlham Əliyevin bəzi çoxmərtəbəli binaların istismarına icazə verilməsinin sadələşdirilməsi haqqında fərmanı bu narahatçılığa son qoydu.
Eurasia Diary-yə açıqlamasında iqtisadçı ekspert Natiq Cəfərli bu fərmanın bir çox mənzil sahiblərinin sənəd probleminin həllində əhəmiyyətli olduğunu qeyd edib.
"Azərbaycanda təxminən 500 min mənzilin çıxarışı yox idi. 90-cı illərin sonunda və 2000-ci illərin əvvəlində tikilən binalar var idi ki, onlar hələ dövlət qeydiyyatıa alınmayıb. Bu isə onların mülkiyyət hüququnun pozulması demək idi, çünki bu vətəndaşa öz mülkiyyətindən istifadəsinə maneçilik törədirdi", Natiq Cəfərli bildirib.
"Bu fərmandan sonra Bakı şəhərində 100 minlərlə mənzilin sənəd almasına şərait yaradacaq. Vətəndaşların öz mülkiyyətini təsdiq edən bir sənədin əldə edilməsi mümkün olacaqş Bu qərar gec qəbul olunsa da ən azından indi vətəndaşların öz əmlakına sahiblənməsi nəzərindən təbii ki, pozitiv bir addımdır. Çünki çoxdan yığılıb qalmış bir problem idi. 10 illərlə davam edirdi"
"Təbii ki, bu daşınmaz əmlak bazarına da təsir edəcək. Çünki həmin mənzillərin bazarda əmtəə kimi çıxış etməsinə imkan yox idi. Çıxarışların alınmasından sonra, həmin mənzillərin bir qisminin mənzil bazarına çıxışı gözlənilir. Bu isə öz növbəsində təklifi artıracaq. Məncə bazarda bu qiymətlərin enməsinə və sabitləşməsinə gətirib çıxaracaq" - deyə ekspert fikrini bildirib.
“MBA Group” konsaltinq şirkətinin baş direktoru Nüsrət İbrahimov fərmanın bir çox imkanlar yaradacağını hesab edir.
"Prezidentin bu fərmanı həm mənzil sahiblərinə, tikinti şirkətlərinə və həm də ümumiyyətlə ölkənin beynəlxalq aləmdə imicinin yüksəlməsinə şərait yaradacaq. Fərmanı həm sosial həm də iqtisadi cəhətdən müsbət qiymətləndirirəm".
"Bu mənzil alqı satqısına da təsirsiz ötüşməyəcək. İlk öncə alqı-satqı mexanizmi asanlaşacaq. Çünki kreditlə mənzil götürdükdə çıxarış tələb olunur. Həmin mənzillərin çıxarışının olması bu prosesə müsbət təsir edəcək" - deyə Nüsrət İbrahimov söyləyib.
Ümumilikdə deyə bilərik ki, ekspertlər prezidentin fərmanını müsbət qiymətləndirərək əhalinin daşınmaz əmlak məsələlərində sənədləşdirmə probleminin həllinə şərait yaradacağını hesab edir.
Ülvi Əhmədli