Ermənistan prezidenti Serj Sarkisyan Azərbaycanın ərazi bütövlüyünü xalqların öz müqəddəratını təyin etməsi prinsipləri ilə birgə tanıdığını bildirib. Bununla bağlı “Eurasia Diary” portalı Beynəlxalq Avrasiya Mətbuat Fondunun sədri Umud Mirzəyevdən müsahibə alıb.
Umud Mirzəyev bildirib ki, Ermənistan prezidenti ilk dəfədir belə bir bəyanatla çıxış edir. “Ermənistan hakimiyyətinin təbii ki, bu zaman kəsiyində bu cür bəyanatla çıxış etməsi təsadüfi deyil. Reallığı inkar etmək çox çətindir. Ermənistan hakimiyyəti də nəhayət ki, bu reallığı başa düşmək məcburiyyətindədir. Gec-tez Ermənistan hakimiyyəti də biməlidir ki, Qarabağa sülh gəlməlidir. Reallıq budur ki, Qarabağda erməni icmasının sayı kəskin şəkildə azalıb. Onlar Qarabağı tərk ediblər. Ermənistanda isə vəziyyət ciddidir. Bu fəlakət Ermənistan hakimiyyətinin hesab dövrününün heç də uzaqda olmadığının göstəricisidir. Ona görə də, Ermənistan prezidenti bu cür çıxış edir. Hiss olunur ki, Ermənistan hakimiyyəti öz işlərinə bəraət qazandırmağa çalışır. Bunu Ermənistandakı vətəndaş cəmiyyəti, insanlar da yaxşı başa düşür. Onların bəziləri artıq həm Azərbaycanda, həm Dağlıq Qarabağda, həm də Rusiyada hərəkətə keçib.
BAMF sədri qeyd edib ki, “7 rayon Rusiya və Ermənistanın təhlükəsizliyi məsələsidir. Rayonların qaytarılmasından sonra sabah regionda baş verə biləcək qarşıdurma qüvvələr nisbətini yenidən poza bilər” ifadəsi ilə Sarkisyan erməni xalqından fərqli olaraq sülh proseslərinə hazır olmadığını, sadəcə görüntü yaratdığını, öz postunu, ətrafındakı bir qrup şəxsin maraqlarını qorumaq siyasəti apardığına sübut göstərir. O bu ifadəsiylə, özünün və havadarları sayəsində qanlı qarşudurmanın səbəbkarlarının gələcək təhlükəsizliyindən narahatdır.
Umud Mirzəyevin sözlərinə görə, nəzərə almaq lazımdır ki, 7 rayonun hər biri ərazisinə, əhalisinə görə Dağlıq Qarabağdan bir neçə dəfə böyük, tamamilə azərbaycanlıların məskunlaşdığı regionlardır və bu beynəlxalq konvensiyalarda öz təsbitini tapıb. “Ümumiyyətlə, Azərbaycanın ərazi bütövlüyünün Sarkisyan tərəfindən tanınıb-tanınmaması problemi yoxdur. Azərbaycan ərazi bütövlüyü beynəlxalq prinsiplər, BMT-nin qətnamələri əsasında tanınır. Sarkisyan isə bir tərəfdən xalqların öz müqəddaratından danışdığı halda, digər tərəfdən Dağlıq Qarabağın Ermənistanın tərkibində olmasından, müstəqil olması xülyasından da əl çəkmədiyini ifadə edir. Bu da Ermənistan hakimiyyətinin qeyri-dürüst, prosesləri doğru qiymətləndirməməyi anlamına gəlir. Bu, indiki Ermənistan hökumətinin problemin həllində proseslərə nəzarətdə qeyri-adekvat münasibətidir. Sarkisyan unutmamalıdır ki, baş verəcək qarşıdurmanın səbəbkarı kimi tarix qarşısında cavab verməli olacaq. Görsənən odur ki, konkret mövqe sərgiləməyi bacarmayan Ermənistan hakimiyyəti ilə problemin həll edilməsi məsələsi çətin olacaq. Bunu erməni xalqı anlamağa başlayır. Ermənistanda bir qrup şəxsin idarə etdiyi xunta Ermənistan Azərbaycanın uğurlarından, regionda yaranan sabitlik və sülh faktorundan Azərbaycanın yararlanmasından narahatlıq keçirir və sülhyaratma proseslərində özünü sülhpərvər və erməni xalqının istəyinə adekvat göstərməyə çalışır. Amma reallıqda və sözün həqiqi mənasında bu belə deyildir”.
Umud Mirzəyevin sözlərinə görə, işğal olunmuş ərazilərdə və nəzarətsiz qalmış yerlərdə muzdluların və ya silahlı birləşmələrin xalqların öz müqqəddəratını təyinetmə hüququna təsirinin aradan qaldırılması istiqamətində BMT –də bu yaxınlarda ciddi qətnamələrə səsvermələr keçiriləcək. “BMT mandatı üzrə müxtəlif məsələlər üzrə dinləmələr, hesabatların hazırlanması istiqamətində fəaliyyətlər gözlənilir. Bu Ermənistan hökuməti üçün bir siqnaldır”.
"Azərbaycanın Erməni xalqına qarşı heç bir antipatiyası yoxdur deyən" BAMF sədri bildirb ki, Bakıda erməni kilsəsi, erməni əlyazmaları bu gün də qorunur, erməni soyadı ilə insanlar təhlükəsiz yaşayır. “Xalqlar bu məsələlərin həllində birbaşa iştirak etsəydilər, problem anındaca həll edilərdi. Azərbaycan dilini bilən, vaxtilə bu dillə özünü ifadə etməyə üstünlük verən Sarkisyanlar bir daha göstərir ki, Dağlıq Qarabağda Azərbaycan faktoru hər yerdə, həmişə özünü göstərib. Bu gün də Dağlıq Qarabağda yaşayanların böyük bir hissəsi Azərbaycanın tərkibində yaşamaq, əvvəlki sülh münasibətlərinin bərpasını istəyirlər. Bu onların gələcək rifahı, regionun güclənməsi, regionda sülhün və əmin-amanlığın bərpası, üçün olduqca vacib faktordur”.