Bu gün ADA-da "Dinlərarası Tolerantlıq və Mətbuatın Rolu" mövzusunda keçirilən beynəlxalq konfransın növbəti panelinin moderatoru tədbirin təşkilatçılarından Beynəlxalq Avrasiya Mətbuat Fondunun sədri Umud Mirzəyev olmuşdur.
"Eurasia Diary"nin xəbərinə görə, mövzu ilə bağlı tədbir iştirakçılarına fikirlərini çatdıran U. Mirzəyev deyib ki, tolerantlıq Azərbaycan xalqının damarlarındadır.
O, Azərbaycanda qaçqın problemi və Dağlıq Qarabağ münaqişəsinin səbəbləri barədə məlumat verib.
BAMF sədri çıxışında qeyd edib ki,1980- ci illərin sonu və 1990-cı illərin əvvəlində qaçqınların sayı 1 milyonu ötdü və Azərbaycan böyük fəlakətlə üz-üzə qaldı. "Qaçqın sayı Azərbaycan kimi bir ölkə üçün böyük rəqəm idi. Mənim qohumlarım, dostlarım illərlə yaşadıqları yeri tərk etməyə məcbur oldu. Biz bu faciəni yaşamışıq".
O həmçinin qeyd edib ki, Dağlıq Qarabağ münaqişəsi beynəlxalq səviyyədə olan problemdir.
"Hazırda Ukraynada baş verənlər Dağlıq Qarabağ hadisələrinin oxşarıdır".
BAMF sədri U.Mirzəyev bu yaxınlarda ailələrində baş verən faciə barədə danışarkən deyib: "Bu günlərdə atam 87 yaşında dünyasını dəyişdi. Onun son arzusu doğma yurdunda ölmək, doğulduğu kənddə dünyasını dəyişmək idi. Biz onu orada - təmas xətdində yerləşən Fizulinin Aşağı Abdurrəhmanlı kəndində hərbiçilərin köməkliyi ilə dəfn etdik..."
Tədbirin aktuallığını və əhəmiyyətini qeyd edən U.Mirzəyev, təşkilatçılara, xüsusi ilə Avropa İttifaqına təşəkkürünü bildirdi.
O, həmçinin "Eurasia Diary"nin Nobel Mükafatı laureatı Məhəmməd Yunus və Azərbaycan Katolik Kilsəsinin rəhbəri Vladimir Feketen haqqında çəkdiyi videomaterialları nümayiş etdirdi.