Rusiyanın paytaxtı Moskvada keçirilən “Dostluq üçün futbol” (Football for Friendship) turnirinə yekun vurulub. "Rekord.az" xəbər verir ki, “Sapsan Arena”da azarkeşlər final qarşılaşmasına şahidlik ediblər.
200-dən çox ölkədən gəlmiş uşaqların müxtəlif qruplarda komandalara bölünərək matçlar keçirib, pley-off mərhələsinə vəsiqə qazandığı oyunların həlledicisində “Komodo əjdahası” ilə “Şimpanze” üz-üzə gəlib.
Turnirin formatına görə, hər ölkədən bir 12 yaşlı futbolçu yarışa dəvət alır. Onlar hərəsində 6 nəfər olmaqla püşklə nadir heyvanların adları verilən komandalara bölünür, müxtəlif qruplarda mübarizə aparırlar. Məsələn, bu turnirdə ölkəmizi 12 yaşlı Conatan Ferqüsson təmsil edib. Gənc futbolçu qapıçı kimi çıxış edib. Ferqüsson “Rotşild zürafəsi” komandasında Kosta-Rika, Qırğızıstan, Sent-Lüsiya, Laos və Kamar adalarından olan gənc oyunçularla birlikdə çıxış edib. Conatan Ferqüsson 2005-ci ildə Bakıda doğulub.
Beləliklə, finalda “Komodo əjdahası” ilə “Şimpanze” qarşılaşıb. “Əjdaha”nın heyətində Uels. Keniya. Dominikan Respublikası, Qvineya-Bisau, Filippin və Braziliyadan uşaqlar yer alıblar. Ancaq adı böyük olsa da, qalib adını çevik “Şimpanze” qazanıb. Bu komandanın heyətində Kameron Qreqori Filip (Domenika), Jeronimo Rodriqes Uruena (Kolumbiya), Peter Paulo (Malavi), Yamiru Ouorou (Benin), Deo Kalenqa Mvenze (Konqo DR) oynayıb, məşqçiləri isə Sent Kitts və Nevisdən olan gənc Aleks Onil Cunior Daniel olub.
Minimal hesabla qalib gələn “Şimpanze” qalibə təqdim edilən “Doqquz dəyər” kubokunu başı üzərinə qaldırıb.
“Qazprom” İSC-nin himayədarlığı ilə “Dostluq üçün futbol” Beynəlxalq Uşaq Sosial proqramı 2013-cü ildən keçirilir. Layihənin məqsədi – uşaq futbolunu inkişaf etdirərək azyaşlılarda digər xalqlar və mədəniyyətlərə etiram və tolerantlığı tərbiyə etməkdir.
Forumun iştirakçıları doqquz dəyəri: dostluq, bərabərlik, ədalət, sağlamlıq, əmin-amanlıq, sədaqət, qələbə, adət-ənənə, dürüstlük və şərəfi təbliğ edir. Proqramda gənc futbolçular (qızlar və oğlanlar, hətta fiziki qüsurlu gənclər), “Dostluq üçün futbol” Uşaq Mətbuat Mərkəzi çərçivəsində gənc jurnalistlər iştirak edir. Son 5 il ərzində proqramda 3,7 mindən çox uşaq iştirak edib.
“Dostluq üçün futbol” layihəsi çərçivəsində minlərlə uşaq və yeniyetmə yoldaşlıq oyunları, açıq məşqlər, fleşmob və idman şənliklərində iştirak edirlər.
Həmin gün bərabərlik, digər xalqların mədəniyyətlərinə hörmət, əmin-amanlıq şəraitində yaşamaq kimi insani dəyərləri qiymətləndirənlər qollarına göy-yaşıl qolbaq taxır. Göy rəng – aydın səmanı, yaşıl isə - hər kəs üçün əlçatan olan futbol meydançasını simvolizə edir. Dünyanın bir çox ölkələrindən olan aparıcılar, jurnalistlər, artistlər iştirakçıları dəstəkləyir.
2017-ci ildə Azərbaycanı təmsil edən Rəvan Kazımov turnirin qaliblərindən biri olub.
"Rekord.az" “Dostluq üçün futbol” layihəsinin informasiya tərəfdaşıdır.