Qazaxıstanın Aktau şəhərində keçirilən Aşihara Karate üzrə Dünya Çempionatı başa çatıb. Noyabrın 08-10 tarixlərində keçirilən Dünya Çempionatına Azərbaycan 11 nəfər idmançı ilə qatılıb.

Dünya çempionatında Azərbaycan Aşihara Karate Əlbəyaxa Döyüş Federasiyasının prezidenti, əməkdar bədən tərbiyəsi və idman xadimi, 5-ci dan qara kəmər ustası Maarif Bağırov, vitse prezidentlər AZGERSU şirkətinin rəhbəri Vüsal Məmmədov və  Beynəlxalq Avrasiya Mətbuat Fondunun prezidenti Umud Mirzəyev iştirak edib.

Dünyanın müxtəlif ölkələrindən 300 nəfər idmançının qatıldığı dünya çempionatında Azərbaycan idmançıları müxtəlif yaş qruplarında finalda döyüşüb.  İdmançılardan Musazadə Musa, Hüseynov Rauf qızıl medal, Vəliyev Rüfət, Rəhimov Fərman, Əhmədov Fəyyaz, Şirinzadə Bahadur,  Qafarov Natiq gümüş medal, Verdiyev Ümid isə bürünc medal qazanıb. Bu Azərbaycan idmançılarının Aşihara Karate Əlbəyaxa Döyüş növü üzrə Dünya Çempionatlarında əldə etdikləri növbəti uğurlardandır. 

Çempionat ərəfəsində Federasiya rəhbərliyi Dünya Aşihara Asossiasiyasının prezidenti Kanco Aşihara ilə görüşüb, bu döyüş sənətinin Azərbaycanda inkişaf etdirilməsi sahəsində müzakirələr aparıb.

Qeyd edək ki, Aşihara karate növü 1972-ci ildə mərhum Hideyuki Aşihara tərəfindən yaradılıb. O, həm cüdo, həm də karate ilə məşğul olduqdan sonra bu idman növünün əsasını qoyub. Bu peşəkar idman növündə mövcud olan fəndlər sadəcə yarış meydanlarında deyil, həm də əlbəyaxa döyüş sənətində kompleks olaraq istifadə olunur. Qeyd edək ki, Azərbaycan Aşihara Karate Fedrasiyası 1998-ci ildə yaradılıb. Azərbaycanın 20 şəhər və rayonunda fəaliyyət göstərir. Ölkənin dövlət orqanları üçün peşəkar idmançıların hazırlanmasında bu əlbəyaxa döyüş növünün sirrlərindən geniş istifadə olunur.