Almaniyada Azərbaycandan olan və qaçqın statusu ala bilməyən miqrantları ölkədən kütləvi şəkildə çıxarmaqda davam edirlər.
Bir müddət əvvəl Almaniyanın bir neçə şəhərindən onlarla azərbaycanlının deportasiya haqda yazmışdı.
Amma deyəsən, Almaniyanın miqrasiya orqanları bununla kifayətlənmək niyyətində deyillər, çünki hər şeydən görünür ki, qanunsuz miqrantların deportasiyası davam edəcək.
Miqrantlara kömək üzrə könüllülər təşkilatının işçisi Bernd Faberin sözlərinə görə, belə miqrant ailələrindən biri Azərbaycandan Almaniyaya 2017-ci ilin aprelində köçmüşdü.
"Ər-arvad, qız və iki qardaş – balacasının adı Aslan idi, tərəfimizdən kiçik mənzildə yerləşdirilmiş və könüllülərimizin qayğısı ilə əhatə olunmuşdular. Biz onlara dil öyrənməkdə, dostlar və iş axtarmaqda kömək etdik. Çox yaxşı ailə idi. Aslan bizim uşaq baxçamıza getdi, onun bacısı məktəbdən sonra rəssamlığı öyrənməyi planlaşdırırdı. Biz onun bəzi işlərini məktəbimizdə asmışdıq. Biz var qüvvəmizlə gənc istedadlar axtarırıq, amma bu halda bizim planlarımız işləmədi", - deyə könüllü təəssüflə xatırlayıb.
Yerli nəşrlər yazırlar ki, Miqrasiya və qaçqınlar üzrə Federal agentlik Azərbaycan ailəsinin yaşamaq üçün sənəd verilməsi ilə bağlı xahişinə hələ bir neçə ay əvvəl rədd cavabı vermişdi.
"Biz məhkəmədə Almaniya hakimiyyətinin bu qərarına etiraz etdik. Prosedur başlanmışdı. Bununla belə, bir neçə gün əvvəl gecə polis insanları yatdıqları yerdə çarpayılardan qaldıraraq Frankfurt aeroportuna aparıb və oradan da təyyarə ilə Bakıya göndərib", - Bernd Faber deyib.
"Polis onların mobil telefonlarını hələ Vaydhauzendə olarkən alıb, buna görə də imkansız insanlar bizə heç nə bildirə bilməyiblər. Onlar yalnız aeroportda başqa insanlardan xahiş ediblər ki, deportasiyaları haqda bizə xəbər çatdırsınlar", - deyə digər könüllü Ute Faber bildirib.
Onun sözlərinə görə, indi Vaydhauzendə hamı yalnız bir şey haqda düşünür: görəsən həmin o üç uşaq Azərbaycanda necə yaşayır? O sadə səbəbdən ki, onların analarının vəziyyəti hələ Almaniyada olarkən pis idi: “O, deportasiya olunacaqlarından çox narahatdı, elə bu səbəbdən də psixi cəhətdən xəstəlik tapmışdı. Onları elə tez deportasiya etdilər ki, hətta həkimlərin ona yazdığı dərmanları belə özü ilə götürə bilmədi".
Könüllülər təşkilatı Bakıya deportasiya edilmiş Azərbaycan ailəsi ilə əlaqə saxlamaqda davam edir. Aslanın getdiyi "Kiçik dünya" uşaq baxçasındakı yaşıdlarının valideynləri onu və ailəsini dəstəkləmək üçün pul yığırlar.
Uşaq baxçasının müdiri Beata Ebiç deyib ki, Aslanın ailəsinə artıq 300 avro göndəriblər. Gələcəkdə isə alman uşaq baxçasının Valideynlər Şurası Aslanın ailəsini aylıq maddi dəstəklə təmin etmək istəyir.
"Kiçik Aslanın deportasiyası ilə bağlı hadisə bizim şəhərdə iz qoydu", - deyə Vaydhauzenə təzə gələndə onları qəbul edən məbədin pastoru Xaydi Reyt bildirib.
"Biz bu Azərbaycan ailəsinin cəmiyyətimizə müvəffəqiyyətli inteqrasiyası üçün çox şey etdik. Biz onlara sənədlərlə bağlı problemlərini həll etməyə kömək edirdik, pensiyaya çıxmış müəllim onlara alman dili öyrədirdi. Bu ailənin deportasiyası bizim hamımız üçün şok oldu", - pastor deyib.
"Uşaqlara izah etmək çox çətindir ki, onların dostu Aslan niyə daha gəlmir. Başqa uşaqların valideynləri həmin uşağı göz yaşları ilə yada salırlar. Biz anlaya bilmirik ki, belə yaxşı insanları bizim ölkəmizdən niyə polisin köməyi ilə qovurlar?!", - deyə Beata Ebiç əlavə edib.