Pakistan Milli Assambleyasının (parlamentin aşağı palatası) deputatları cümə günü keçirilən səsvermənin nəticəsinə əsasən mərkəzçi “Təhrik-ə-İnsaf” (“Ədalət uğrunda hərəkat”) partiyasının lideri İmran Xanı ölkənin yeni Baş naziri seçiblər.
GEO TV telekanalının yaydığı məlumata görə, 65 yaşlı İmran Xanın namizədliyini 176 deputat dəstəkləyib. Onun keçmiş hakim partiyadan olan əsas rəqibi – “Pakistan müsəlman liqası” partiyasının rəhbəri Şəbhaz Şərif 96 səs toplaya bilib.
İyulun 25-də keçirilən ümummilli seçkilərdə İmran Xanın partiyası Milli Assambleyada 272 ümumi yerdən 115-nə yiyələnsə də, hökuməti formalaşdırmaq üçün sadə çoxluğu qazana bilməmişdi. Bunun ardından “Təhrik-ə-İnsaf” partiyası digər siyasi birləşmələrlə danışıqlara başlayıb və 342 deputatdan 180-nin dəstəyini təmin edərək hakim koalisiya qurulmasına nail olub.
Ölkənin digər iri partiyaları – parlamentin aşağı palatasında 64 yerə sahib olan “Pakistan müsəlman liqası” və 43 yerə sahib olan “Pakistan xalq partiyası” artıq müxalifəti təşkil edir. Bir qədər əvvəl onlar “koordinasiya olunmuş müştərək fəaliyyət strategiyası” hazırlamaq barədə razılığa gəliblər.
Pakistan hökumətinin yeni başçısının avqustun 18-də and içəcəyi və vəzifələrinin icrasına başlayacağı gözlənilir.
İmran Xan 1952-ci ildə anadan olub. 1972-ci ildə Oksford universitetinin iqtisadi bakalavr dərəcəsini alıb. 1996-cı ildə “Ədalət uğrunda hərəkat” siyasi partiyasının əsasını qoyub.