Türkiyənin “Haber7” saytının yazarı və “Kanal 7”nin Ankara üzrə nümayəndəsi Mehmet Acet Rusiya və Türkiyə prezidentləri Vladimir Putin və Rəcəb Tayyib Ərdoğanın Soçi görüşündən əvvəl Moskvanın Ankaraya etdiyi bir təklif barədə yazıb.

Eurasia Diary publika.az-a istinadən xəbər verir ki, mənbəyə istinad edən yazarın sözlərinə görə, Rusiya Türkiyəyə “Türkiyə sərhədi boyu 1000 kvadrat kilometrlik ərazini sizin nəzarətinizə verək, qalanına qarışmayın” şəklində təklif edib.

Mehmet Acet qeyd edib ki, təklif Türkiyə tərəfindən rədd edilib. Onun sözlərinə görə, təklif qəbul ediləcəyi halda, İdlibdə daha əvvəllər Hələb və Gutada qeydə alınan Qroznı modeli tətbiq edilə bilərdi. Beləliklə, İdlib daş dövrünə qayıdacaqdı.

Bundan başqa, Ankaranın İdlibdə müqavimət göstərməsinin arxa planında Türkiyənin təhlükəsizliyini yaxından maraqlandıran əhəmiyyətli bir səbəb var idi. Mehmet Acet qeyd edib ki, rejim qüvvələri İdlibdə əməliyyat keçirsəydi, növbəti hədəflər Türkiyə Silahlı Qüvvələri və Azad Suriya Ordusunun nəzarətində olan Afrin və “Fərat Qalxanı” bölgəsi olardı. İdlib razılaşması Türkiyənin Afrin və “Fərat Qalxanı” bölgəsində qazandıqlarının təminat altına alınması demək idi.