Yerli, regional və beynəlxalq səviyyələrdə sülh elçilərinin, ziyalıların, sağlam düşüncə və rəy sahiblərinin rolu insan təfəkkürünün ən yeni nəailiyyətlərini, mexanizmlərini və texniki vasitələrini ekstremist ideologiya ilə mübarizəyə səfərbər edib tolerantlıq, liberalizm, plüralizm dəyərlərini yaymaq, təcrid və özünəqapanmadan uzaqlaşıb multikulturalizm ideyalarını təbliğ etməkdən ibarətdir.
Gərginlik ocaqlarının və ekstremizm qaynaqlarının, qadın, uşaq və yaşlı insanların hüquqlarının müxtəlif növ pozulması hallarının aradan qaldırılmasına yardım üçün bu qarşıdurma ən qısa zamanda uğurla başa çatdırılmalıdır.
Ekstremistlər gənc və yeniyetmələri cihad, fədakarlıq barədə cəlbedici vədlərlə aldatmaqla, əslində onlara dünyanın bütün sağlam düşüncə sahibləri, müdrik insanları, dövlət və ictimaiyyət nümayəndələri, filosof və mütəfəkkir insanları, hüquqşünaş və diplomatları, tarixçiləri və ədibləri tərəfindən qətiyyətlə rədd edilən zəhərli radikal fikirlər aşılayırlar.
Bizim qaldırdığımız bu aktual problemin ideoloji, dini, hüquqi, təhlükəsizlik və kəşfiyyat xarakterli ən müxtəlif həll variantları vardır. Bu sahədə beynəlxalq qanunvericiliyə, humanizm, xeyirxahlıq, azadlıq, xeyriyyəçilik, tolerantlıq, birgəyaşayış və dözümlülük dəyərlərinə sadiq BMT-yə üzv dövlətlər və beynəlxalq təşkilatlar arasında sıx əməkdaşlığa böyük ehtiyac vardır.
Ümid edilə bilər ki, sülhə, əmin-amanlığa inamımız möhkəmlənəcək, ekstremistlərin qarşısına bizim üçün “Musanın əsası”-nı təmsil edən ziyalı fikir və həyata bağlılıqla, insanların yaradıcı, ədəbi, elmi, mədəni imkanlarını yüksək qiymətləndirməklə, gənclərlə və tələbələrlə ideoloji tərbiyə işini gücləndirməklə çıxa bilərik. Bu, təhlükələrdən, xəbis terrorçulardan qurtuluş yolumuzdur.
Mədəniyyətlərarası dialoq mərkəzinin direktoru
Şeyx Zeytuni Lütfi Çəndərli. Tunis.
Ərəb dilindən tərcümə edən Fəlsəfə doktoru Zakir Qasımov