İsrail ordusu Qəzza zolağında 150-ə yaxın hədəfə zərbə endirib.

Eurasia Diary xəbər verir ki, bu məlumatı İsrail ordusunun mətbuat xidməti yayıb.

Məlumata görə, vurulan obyektlərdən biri HƏMAS-ın hərbi kəşfiyyatının binası olub. Binada silah anbarının olduğu da bildirilib.

Ümumilikdə İsrailin Qəzzada 150 hədəfə zərbə endirdiyi açıqlanıb. Bu hədəflərə 400 raket və mina atılıb.

Məlumata görə, qarşıdurmalar zamanı 50 nəfər yaralanıb, onlardan 2-sinin vəziyyəti ağırdır.

İsrail ordusunun məhv etdiyi hədəflər sırasında HƏMAS-a məxsus mövqelər, silah anbarları, raket buraxılışı üçün məntəqələr, hərbi məqsədlərlə istifadə olunan bir sıra inzibati binalar, Fələstin hərbi-dəniz qüvvələrinə məxsus gəmi də yer alıb.

İsrail həmçinin HƏMAS-ın hazırda 20 min raket və minasının olduğunu deyib. O, Qəzzadakı hərbi arsenalın tükənmək potensialının olmadığını bildirib.

HƏMAS-ın hərbi qanadı olan İzzəddin əl Qəssam briqadasının nümayəndəsi Əbu Obeyda da açıqlama yayıb. O, İsrailin mülki obyektlərin bombardmanını dayandırmayacağı halda İsrailin Aşdoda və Beyer Şevı şəhərlərini raket atəşinə tutacaqlarını bildirib.

Qeyd edək ki, Qəzza zolağında vəziyyət bir neçə gündür gərginləşib. Belə ki, İsrail bölgəyə əlavə qüvvələr gətirib, İslami Cihad təşkilatı isə ümumi səfərbərlik elan edib.