Yeni erməni iqtidarı müstəqil siyasət aparmaq cəhdlərini davam etdirdiyi təqdirdə Kreml Ermənistana yeni “sürprizlər” hazırlaya bilər.

Eurasia Diary xəbər verir ki, bu sözləri Axar.az-a Ermənistanın Qazaxıstana yeni səfri təyin etməsinə münasibət bildirən politoloq Əhəd Məmmədli deyib. O bildirib ki, Qazaxıstanla münasibətlərin düzəldilməsi üçün Ermənistan “daha peşakar və çəkili diplomatdan” istifadə etmək niyyətini ortaya qoydu:

“Üstəlik, Astanaya yeni təyin edilmiş səfir KTMT-ni də yaxşı tanıyır. KTMT-nin son iclasında Nazarbayev, Putin və Lukaşenko Paşinyana siyasi dərs keçdi. Yəni bir sözlə, KTMT-nin siyasi ağırçəkililəri Nikola yerini göstərdi. İrəvan üçün o qədər də uğurlu olmayan Bolton səfərini də nəzərə alsaq, son dönəmlər xarici siyasətdə Paşinyanın ard-arda uğursuzluğa düçar olduğunu müşahidə etmiş olarıq”.

Politoloq qeyd edib ki, Qazaxstana yeni və daha təcrübəli səfir təyin edilməsi Astana-İrəvan münasibətlərinə təsir etməyəcək:

“Çətin ki, bu addımla Nazarbayevin Paşinyan haqqında fikirləri müsbətə dəyişsin. Həm birinci Qarabağ, həm də Aprel müharibəsində Nazarbayev və qardaş Qazaxıstan Azərbaycanın yanında olub. Bundan sonra da belə olacağına şübhə yoxdur”.

Qeyd edək ki, dünən Ermənistanın Qazaxıstandakı səfiri Ara Saakyan geri çağırılıb. Bundan cəmi bir neçə saat sonra isə onun yerinə Qagik Kalaçyan təyin edilib.

Yeni təyin olunan səfir 2001-2004-cü illərdə KTMT-nin daimi şurasının üzvü olub. 2009-2011-ci illərdə isə Ermənistanın Yunanıstan, Albaniya və Serbiyadakı səfiri işləyib.