İsrailin müdafiə naziri vəzifəsini öz üzərimə götürürəm.

Eurasia Diary xəbər verir ki, bu sözləri İsrailin Baş naziri Benyamin Netanyahu Müdafiə Nazirliyinin binasından televiziya vasitəsilə müraciətində deyib. O bildirib ki, ölkənin təhlükəsizliyi siyasətdən və şəxsi maraqlardan kənardadır.

O qeyd edib ki, təhlükəsizlik sahəsində çətin vəziyyəti nəzərə alaraq, hazırda yeni seçkilərin keçirilməsini lazımlı və düzgün addım kimi qiymətləndirmir:

“Biz hazırda təhlükəsizliklə bağlı ən çətin dönəmlərdən birindəyik. Bu dönəmdə hökuməti parçalamaq və seçki keçirmək olmaz”.

O, koalisiya üzvlərinin bu məsuliyyəti anladıqlarını və hökumətin istefasında israr etməyəcəklərinə ümid etdiyini bildirib.

Qeyd edək ki, İsrailin Müdafiə naziri Aviqdor Libermanın istefasından sonra ölkədə növbədənkənar parlament seçkilərinin keçirilməsi məsələsi gündəmə gəlib.

***

İsrailin baş naziri Binyamin Netanyahu Aviqdor Libermanın istefasından sonra ölkənin müdafiə naziri vəzifəsinin səlahiyyətlərini icra edəcək.

Eurasia Diary “Deutsche Welle” nəşrinə istinadən xəbər verir ki, Netanyahu bundan sonra iki vəzifədə eyni zamanda çalışacaq.

Xatırladaq ki, bundan öncə o, ölkənin xarici işlər nazirinin də səlahiyyətlərini icra edirdi.

Aviqador Liberman noyabrın 14-də istefaya getdiyini bəyan edib.

O, bunu baş nazirlə aralarında olan ciddi fikir ayrılıqlarının olması ilə izah edib.