Rusiya kartoqrafiya xidməti “Yandex.Maps” təsadüfən İsrail və Türkiyədəki yüzlərlə hərbi obyektin, eləcə də iki NATO hərbi bazasının dəqiq yerini aşkara çıxarıb.
Eurasia Diary xəbər verir ki, bu barədə məlumatı Amerikalı Alimlər Federasiyası (FAS) araşdırmaçısı Mett Korda öz “Twitter” hesabında yazıb.
Korda yazıb ki, Rusiya xəritə xidməti “Yandex” Türkiyə və İsraildə 300-dən artıq hərbi təsisatın yerini müəyyənləşdirib və onların dəqiq təsvirini məhdudlaşdırıb.
Tədqiqatçı onu da bildirib ki, əraziləri “Google Earth”dəki görüntülərlə müqayisə etdikdə, böyük aeorodromlar, limanlar, bunkerlər və şəhərlərdəki kiçik hərbi binalar kimi “Google”da qeyd edilməyən çox sayda hərbi obyektlər aşkarlanıb. Onların bir çoxu tam məxfi yerlərdir. Korda 300-ə qədər belə yer tapdığını qeyd edib.
O həmçinin qeyd edib ki, “Yandex” tərəfindən İzmir və İncirlikdəki NATO hərbi bazasının təsviri də məhdudlaşdırılıb.
