Afrikanın cənubunda yerləşən Zimbabve inflyasiya ilə mübarizə aparmaq üçün yeni valyutasını dövriyyəyə buraxıb.

Ednews sozcu.com-a istinadən xəbər verir ki, yüksək inflyasiya ilə mübarizə aparan Zimbabve bu gün qızılla dəstəklənən yeni valyutanı dövriyyəyə buraxıb.

Zimbabve Qızılı (ZiG) Cənubi Afrika ölkəsinin son 10 ildə dövriyyəyə buraxdığı üçüncü valyutadır.

BBC-nin məlumatına görə, Mərkəzi Bankın bu addımı inflyasiyanın mart ayında 55 faizə çatdığı ölkədə iqtisadiyyatı sabitləşdirmək məqsədi daşıyır. ZiG təkcə bu il dəyərinin dörddə üçünü itirmiş Zimbabve dolları RTGS-ni əvəz edir.

Hazırda ölkədə əməliyyatların 85 faizi dollarla aparılır. Dollar ZiG ilə dövriyyəyə davam edəcək. Qarşıdakı dövrdə ölkədə əksər insanların dollara üstünlük verəcəyi düşünülür.

Zimbabvelilər 2008-ci ildən inflyasiyanın nəzarətdən çıxdığı və 10 trilyon Zimbabve dolları dəyərində əskinasların çap edildiyi vaxtdan Mərkəzi Bankın hərəkətlərinə inamsızlıq nümayiş etdirir.

2008-ci il böhranından sonra Mərkəzi Bank öz valyutasını ləğv etmək qərarına gəldi və uzun illər yalnız ABŞ Dolları və Cənubi Afrika Randı kimi xarici əskinaslardan istifadə etdi.

2016-cı ilin sonunda qurum ABŞ dolları ilə kreditlə dəstəklənən istiqraz notu adlı yeni valyuta təqdim etdi.

O zamankı Mərkəzi Bankın rəhbəri Con Manqudya valyutanın ABŞ dolları ilə eyni səviyyədə qalacağına söz vermişdi. Lakin hökumət həddindən artıq pul çap etməyə başlayanda valyuta çökdü.

Mərkəzi Bankın hazırkı sədri də vəd edir ki, daha pul çapına icazə verilməyəcək.

Xəyal Ramiz