Pakistan İslam Respublikasında hakim "Təhrik-ə-İnsaf” (Ədalət uğrunda hərəkat) partiyasının namizədi Arif Alvi sentyabrın 4-də ölkənin 13-cü prezidenti seçilib. Prezident seçkilərində üç namizəd - hakim "Ədalət uğrunda hərəkat” partiyasının qurucularından biri və parlamentin aşağı palatasının üzvü Arif Alvi, "Pakistan xalq partiyası”ndan Aitizaz Ahsan, həmçinin bir neçə müxalifət birliyinin nümayəndəsi - "Birləşmiş aksiya hərəkatı”nın lideri Mövlanə Fazl-ur-Rahman mübarizə aparırdı.
Pakistan İslam Respublikasının yeni Prezidenti Arif Alvi 1949-cu ildə Kəraçidə anadan olub. "Təhrik-ə-İnsaf” partiyasının qurucularından olan Alvi ilk siyasi fəaliyyətinə “Cəmaati İslamidə” başlamışdır. Alvi'nin atası Habiburrahman Əlahi Alvi Hindistanın ilk baş naziri Cəvahiral Nehrunun diş həkimi olub. Arif Alvi 1979-cu ildən siyasət ilə məşğul olsa da ilk dəfə 2013-cü ildə millət vəkili seçilib.
Pakistan prezidenti federal parlamentin aşağı və yuxarı palatalarından, həmçinin ölkənin 4 əyalətinin qanunverici yığıncaqlarından təşkil olunmuş 1174 deputat və senatordan ibarət seçicilər kollegiyası tərəfindən seçilir. Qeyd etmək lazımdır ki, Pakistanda keçirilən seçkilərdə məhz Arif Alvinin prezident seçilməsi "Təhrik-ə-İnsaf” partiyasının lideri İmran Xanın hakimiyyətini sığortalayacaq.
Arif Alvinin prezident seçilməsinin Pakistanın daxili və xarici siyasətinə önəmli bir təsiri olacağını demək yalnış bir fikir olardı. Buna səbəb əvvəla ölkənin parlamentar demokratiya sistemi əsasında idarə edilməsi və buna görə də baş nazirin prezidentə nisbətən daha geniş səlahiyyətlərə sahib olmasıdır. Digər bir səbəb isə ölkədə mövcud siyasi iqtidarın dəstəklədiyi bir nümayəndənin prezident seçilməsidir. Pakistanın isə həm daxili, həm də xarici siyasətdə bir çox islahatlara ehtiyacı var. Son zamanlar ABŞ-la münasibətlərin kəskinləşməsi, Hindistanla hələ də tam bir sülhün əldə edilə bilməməsi, ölkənin daxilində terror qruplarının məhdudlaşdırıla bilinməyən fəaliyyəti, sosial-iqtisadi problemlər və digər məsələlər Pakistan hökumətinin həll etməli olduğu başlıca problemlərdir.
Pakistan Türkiyə və Azərbaycanla sıx əməkdaşlıq edən bir respublikadır. Xüsusən son dövrlərdə hərbi-siyasi sahələrdə Azərbaycanla bir çox müqavilələrin imzalanması iki dövlət arasındaki münasibətlərin daha da inkişafına təkan vermişdir. Ona görə də praqnozlaşdırmaq olar ki, Arif Alvi də ilk rəsmi səfərlərindən birini Azərbaycana edəcək. Arif Alvinin prezident seçilməsi fikrimizcə iki dövlət arasında olan dostluq-müttəfiqlik münasibətlərini gücləndirəcək. Çünki Alvi “panistlamist” və “ittihatçı ideoloji” görüşlərə sahib bir siyasətçidir. Bu isə o deməkdir ki, Alvi bütün müsəlman xalqlarına və müsəlman ölkələrinə xüsusi rəğbət bəsləyir.
Nicat İsmayılov
