Yazıçı və publisist Əhməd Abdo Tərabik
1991-ci ildə keçmiş Sovet İttifaqından müstəqillik qazandıqdan sonra, qədim tarixə malik bir dövlət və hələ 1918-ci ildə İslam Şərqində təsis edilmiş ilk parlamentli respublika olmaq etibarilə Azərbaycan, beynəlxalq aləmə inteqrasiya, dünyada baş verən iqtisadi, ictimai və mədəni proseslərdə fəal iştirak yolunu seçmişdir. Azərbaycan ərəb və islam ölkələri ilə dostluq münasibətlərinin inkişaf etdirilməsini öz xarici siyasətinin prioritetlərindən biri hesab edir.
Azərbaycan müstəqilliyini bərpa etdikdən sonra İslam aləminin ayrılmaz bir hissəsi kimi, ərəb və islam dünyası dövlətlərilə sıx və davamlı münasibətlərin qurulmasına xüsusi diqqət yetirmiş və yetirməkdədir. Bu mənada Azərbaycanın ərəb və islam ailəsinin fəal üzvü olan Küveyt Dövlətilə də möhkəm əlaqələri vardır.
Azərbaycanla Küveyt arasında diplomatik münasibətlərin qurulması bu iki dövlət arasında əlaqələrin inkişafının ən bariz göstəricisidir. Diplomatik münasibətlər siyasi, iqtisadi sahələrdə əməkdaşlığın inkişafına, iki xalq arasında mövcud olan və tarixi əsrlərlə ölçülən, yalnız Sovet dövründə zəifləmiş əlaqələrin bərpasına yardım etmişdir.
Bu iki xalq arasında əlaqələrin tarixi uzaq keçmişə söykənir. Azərbaycan və Küveytin önəmli iqtisadi və mədəni rol oynadıqları qədim İpək yolu bu əlaqələrin daha da möhkəmlənməsinə səbəb olmuşdur. İpək yolu sadəcə yuk daşıma, ticarət yolu olmamışdır, o həm də bu yolun keçdiyi ölkə xalqları, o cümlədən Küveyt və Azərbaycan xalqları arasında mədəni bağlılığın möhkəmlənməsində mühüm amil idi.
Müstəqilliyin bərpa olunmasından dərhal sonra Azərbaycanla Küveyt qısa müddət ərzində öz xalqlarının iradəsinin ifadəsi olaraq iki ölkə arasında səmərəli əməkdaşlığın möhkəm təməlini qoymağa müvəffəq olmuşlar. Bu əməkdaşlıq qarşılıqlı siyasi dəstək, yüksək səviyyəli səfərlər və inkişaf edən iqtisadi əlaqələrlə daha da gücləndirilir.
Bir neçə il ərzində hər iki ölkənin paytaxtları Əl-Küveyt və Bakı şəhərlərində səfirliklər açıldı və Azərbaycanla Küveyt arasında yüksək səviyyəli səfərlər həyata keçirildi. Bu səfərlər ölkələr arasında dostluq əlaqələrinin möhkəmlənməsi və ikitərəfli əməkdaşlığın genişlənməsi üçün böyük imkanların mövcud olmasını bir daha təsdiqlədi. Bu görüşlər öz pik nöqtəsinə Azərbaycan Respublikasının Prezidenti İlham Əliyevin 2009-cu ilin fevralında Küveytə rəsmi səfərilə çatmış oldu. Bu səfər ikitərəfli münasibətlərin möhkəmlənməsinə yeni bir stimul yaratdı. Bu səfər həm də iki xalq arasındakı tarixi dostluq münasibətlərinin dərinliyini bir daha təsdiq etdi. Səfər əsnasında bir neçə ikitərəfli sazişə də imza atıldı. Bu sazişlər sərmayələrin təşviqi və qarşılıqlı qorunması, vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması, ticarət, turizm və ölkələr arasında başqa qarşılıqlı maraqlar doğuran sahələri əhatə edir. Küveyt Dövlətinin Millət Məclisinin sədri Mərzuq Əli əl-Ğanim Azərbaycan parlamentinin 100 illiyi münasibətilə keçiriləcək təntənəli iclasda iştirak etmək üçün sentyabrın 19-da Bakıya səfər etdi. Nümayəndə heyətinə Məcliz üzvləri Məhəmməd Hüveydə və Nasir əl-Dausəri də daxil idilər.
Bu hadisə Azərbaycanla Küveyt arasında müxtəlif sahələri əhatə edən əlaqələrin dərinliyini sübut edir. Azərbaycanla Küveyt, Azərbaycanla ərəb və islam dünyası arasında münasibətlərin bir sahəsi kimi ikitərəfli iqtisadi, mədəni və elmi əlaqələrin daha da inkişaf etdirilməsinə və möhkəmləndirilməsinə yönəlik səylərini artırırlar. Bu da öz növbəsində bir çox sahələrdə ümumi dəyərlərə sahib olan müsəlman xalqlarının bir-birinə daha çox yaxınlaşmasına, onları bir-birinə bağlayan tellərin daha da möhkəmlənməsinə zəmin yaradır, bu xalqlar üçün daha çox sabitlik və tərəqqi təmin edir.
Ərəb dilindən tərcümə edən Fəlsəfə doktoru Zakir Qasımov