Ötən günlərdə Report informasiya agentliyi jurnalist Fuad Abbasovun Rusiyada saxlandığı və deport olunması üçün məhkəməyə çıxarıldığı haqda məlumat yayıb.
Eurasia Diary bu məlumata jurnalistin vəkili Elman Paşayevin münasibətini öyrənib. Öncə Report yayan məlumatı təqdim edək:
"Rusiyanın hüquq-mühafizə orqanları paytaxt Moskvada yaşayan və fəaliyyət göstərən azərbaycanlı jurnalist Fuad Abbasovu saxlayıb.
"Report"un Rusiya bürosu xəbər verir ki, jurnalist Rusiyadan deportasiya edilir.
Belə ki, Rusiyanın bir neçə azərbaycanlı icması F.Abbasovun ölkədən deportasiya olunması tələbi ilə Moskva məhkəməsinə müraciət edib.
Moskva məhkəməsi mayın 7-də "Xarici vətəndaşın və vətəndaşlığı olmayan şəxsin Rusiya Federasiyası ərazisinə girişinə qadağa qoyulması" adlı 2737/2019 nömrəli işə baxıb. Proses mayın 17-də yekunlaşıb.
Mayın 18-də isə Rusiyanın hüquq-mühafizə orqanları məhkəmənin qərarı ilə F.Abbasovu saxlayıb. Hazırda jurnalistin Azərbaycana deportasiya edilməsi üçün prosedurlar həyata keçirilir".
Rusiyada F. Abbasovun hüquqşünası Elman Paşayev Eurasia Dairy -ə deyib ki, guya Fuad Abbasovun saxlandığı anı əks etdirən foto jurnalistə məxsus deyil: "Dünən onu məhkəmədə mən təmsil etdim. Fuad Abbasov məhkəməyə çıxmadı. O, heç bir cinayət etməyib və cinayət əməlinə görə də mühakimə olunmur. Ona görə də onun qoluna qandal vurulması qanunla mümkünsüzdür. Foto Fuad Abbasova məxsus deyil. Xəbərdəki fakt kimi təqdim olunan iddialar da yanlışdır".
Eyni zamanda E. Paşayev Fuad Abbasovun hüquq mühafizə orqanları tərəfindən hər hansısa zorakılığa məruz qalıb-qalmaması məsələsinə də aydınlıq gətirib. Vəkil qeyd edib ki, “mən Fuadla görüşəndə mənə bu barədə heç nə demədi. Vəziyyəti isə yaxşı idi”.
Vəkil deyir ki, Fuad Abbasovla bağlı şikayətlər və problem var, özü də ciddidir: "Lakin bu şikayətləri azərbaycanlılar etməyib. Fuadla bağlı bütün şikayətləri ermənilər ediblər. Hazırda bu şikayətlər üzrə də məhkəmə gedir".
“AzerRos” rəhbəri Mehriban Sadıxovanın və “AzerMos” rəhbəri Ağadadaş Kərimovun Fuad Abbasovun deportasiyasında rolu varmı sualına isə E. Paşayev belə cavab verib: “Mən bu barədə konkret bir şey deyə bilmərəm. Çünki, ən azı onların Fuadla bağlı hansısa ədliyyə orqanına konkret müraciəti olmayıb. Ancaq əsas şikayətlər qeyd etdiyim kimi ermənilərdən gəlib”.
E. Paşayev həmçinin bildirib ki, jurnalist hal-hazırda Moskva şəhəri Ximki vilayəti məhkəməsinin qərarı ilə miqrantlar üçün nəzərdə tutulan izolyatorda saxlanılır. Onun Bakıya deportasiyası gözlənilir. Vəkili bildirib ki, buna səbəb aprel ayında Rusiya Federal Təhlükəsizlik Xidmətinin (FCB) F.Abbasovun yaşama haqqını ləğv etməsi qərarını çıxarmasıdır. İddialara görə, FCB-in bu qərarı erməni icmalarının və Azərbaycanın Moskvada fəaliyyət göstərən bəzi icmalarının şikayəti əsasında verilib. F.Abbasov may ayının 2-də Moskvanı tərk etməli idi. Lakin tərk etmədiyi üçün ona saxlanma qərarı verilib. 16 mayda F.Abbasov Moskvann Ximki Vilayət Məhkəməsini qərarı ilə saxlanılıb. Vəkil Elçin Paşayev deyir ki, jurnalistin Rusiyada yaşama hüququnun 17 apreldə məhkəmə qərarı ilə ləğv edilməsindən Fuad Abbasovun özünün xəbəri olmayıb.
Hazırda F.Abbasovun vəziyyəti yaxşıdır. Jurnalist miqrantlar üçün nəzərdə tutulan izolyatorda saxlanılır. Azərbaycan səfirliyinə bu barədə məlumat verilib və səfirlik bu prosesə qoşulub. Gələn həftənin ilk günlərində vəkil F.Abbasovun izolyatordan çıxarılıb, Azərbaycana qaytarılması barədə vəsatət verəcək. Müsahibimizin dediyinə görə, həm səfirliyin, həm də onun iştirakı ilə bu proses baş tutacaq.
E.Paşayev hesab edir ki, F.Abbasov haqda verilən şikayətlər və Ximki vilayət məhkəməsinin qərarı qərəzlidir, düzgün deyil. Ona görə də o, bu qərardan məhkəmə qaydasında şikayət verəcək. Vəkil inanır ki, həmin qərar bir neçə ay sonra ləğv olunacaq.
Vəkilin sözlərinə görə Abbasovun əlehinə yazılan şikayətlər daha çox ermənilərə qarşı təxribat və vətəndaşlar arasında qarşıdurma yaratmaqla bağlıdır.
Fuad Abbasovun Moskvada həbsindən sonra Rusiyada yaşayan azərbaycanlılar onun hüquqlarının müdafiəsinə dəstək verməsi üçün Rusiya Azərbaycanlıları İttifaqının prezidenti Fizuli Məmmədova müraciət edib.
Bu haqda açıqlama verən Fizuli Məmmədov bildirib ki, azərbaycanlı kimi jurnalistə mümkün dəstəyi verməyə hazırdır: ”Son iki gündə Rusiyanın bir çox vilayətlərində yaşayan soydaşlarımızdan müraciətlər alıram. Hər kəs Fuad Abbasovun ermənipərəst qüvvələrin Rusiya hüquq mühafizə orqanlarına müraciəti əsasında həbsindən rahatsızdır. Bu müraciətlərin çoxu sosial şəbəkələrdə də yayılıb. Biz Fuad Abbasobun vəkili Elman Paşayevlə əlaqə saxladıq. Durumu dəqiqləşdirdik. Hazırda Fuad Abbasov istintaq altındadır. Elman Paşayev hüquq müstəvisində bütün addımların atıldığını bildirdi. Biz də öz tərəfimizdən gərək olan dəstəyi əsirgəməyəcəyimizi ifadə etdik”.
Fizuli Məmmədov bildirib ki, Rusiya Azərbaycanlıları İttifaqı Rusiyadakı bütün soydaşlarımızın problemlərinə həssas yanaşır və mümkün vasitələrlə dəstək verməyə hazırdır.
Nicat İsmayılov