“Pilotumuzun Rusiya tərəfindən vurulması təstiq olunmayıb. O elə belə sözdür. Ümumiyyətlə onlar şaiələrdir. Komissiya işləyir. Dövlət komisiyasında mütəxəssislər oturub və o mütəxəssizlər rəy verəcəklər”.
Bu barədə Eurasia Diary-ə açıqlamasında hərbi ekspert, polkovnik Şair Ramaldanov Azərbaycan Hərbi Hava Qüvvələrinə məxsus MİQ-29 döyüş təyyarəsinin Xəzər dənizi üzərində Rusiya tərəfindən vurulması barədə iddialara münasibət bildirərkən deyib.
“Təyyarənin “qara qutu”su hələ tapılmayıb, oradakı məlumatı hələ heç kim oxumayıb. Yəni komissiya işləyib qərar çıxarandan sonra bilmək olacaq ki, səbəb nədir. MİQ-29 əgər Rusiya tərəfindən vurulsaydı, artıq dövlət tərəfindən bəyanatlar da olacaqdı, Xarici İşlər Nazirliyi nota verəcəkdi və s. Bilirsiniz ki, vurulmaq başqa cür olur. Ya silahla, ya da raketlə. O ki qaldı digər versiyalara, indi bu saat çoxlu versiyalar irəli sürülür. Onlar sadəcə bir ehtimaldır. Ancaq ki, fakt deyil”, - deyən polkovnik hərbi təyyarəmizin vurulma ehtimalının sosial şəbəkələrdə və saytlarda müzakirə edildiyini də bildirib:
“Yenə deyirəm, o sadəcə ehtimaldır. 100 ehtimal ola bilər, amma gerçək bir olur. Ona görə əlbəttə ki, Azərbaycan dövləti də, yaradılan komissiya da, müdafiə naziri də, hamısı maraqlıdır ki, təyyarənin necə dənizə düşməsini səbəblərini öyrənsinlər, aydınlaşdırsınlar. Ancaq bunun üçün vaxt lazımdır. Üzeyir Cəfərovun Azərbaycan təyyarəsinin Rusiya tərəfindən vurulması barədə verdiyi məlumatı oxumuşam. Orda yazılıb ki, bir versiya kimi buna baxmaq lazımdır və komissiya bu versiyanı da nəzərdən keçirsin. Əlbəttə, komissiya bütün versiyaları nəzərdən keçirəcək. Ancaq ki, “qara qutu”da hansı məlumat çıxacaq, onu heç kim bilmir. Təyyarənin yeri deyirlər ki, bəllidir. Komissiyanın iştirakı ilə “qara qutu”da olan yazılar oxunmalıdır. Ondan sonra komissiya rəy verəcək ki, bu təyyarə nədən qəzaya uğrayıb”.
Qeyd edək ki, hərbi ekspert, polkovnik-leytenant Üzeyir Cəfərov dünən özünün feysbuk hesabında Azərbaycana məxsus qırıcı təyyarənin Rusiya tərəfindən vurulduğunu bildirib.
"Azərbaycan Müdafiə Nazirliyinin pilotu və MiQ-29 döyüş təyyarəsi Rusiya Müdafiə Nazirliyinin Cənub Qoşunlarının tərkibinə daxil olan Xəzər Donanmasının hərbçiləri tərəfindən səhvən radioelektron avadanlıqların istifadəisi ilə sıradan çıxarılıb. Baxmayaraq ki, Rusiya tərəfinin də məlumatı var idi ki, bizim hərbi pilotlarımız gecə uçuşları həyata keçirəcəklər. Sadəcə, axşam saat 22 radələrində Rusiya tərəfinin hərbçiləri ya bilərəkdən, ya da bilməyərəkdən (bunu yalnız istintaq qrupu araşdıra və dəqiq qiymət verə bilər) ən müasir REM vasitələrini işə salaraq MiQ-29 təyyarəsinin fəaliyyətini iflic ediblər. Bu məlumatı mənə ölkəmizdən kənar çox mötəbər bir hərbi diplomat bir neçə saat bundan əvvəl verdi. Və sizi tam əmin edirəm ki, hadisənin baş vermə vaxtı və iyulun 18-dən rusların məhz Xəzər dənizinin Şimal istiqamətində təyyarəmizin qəzaya uğradığı ərazinin lap yaxınlığında REM qoşunlarının genişmiqyaslı hərbi təlimlər keçirməsi ilə birbaşa əlaqəsinin olması Azərbaycanın MiQ-29 təyyarəsinin ya qəsdən, ya da bilməyərəkdən "söndürülməsi" versiyasını tam əsaslandırır", - deyə Ü.Cəfərov qeyd edib.
Xatırladaq ki, iyulun 24-də saat 22.00 radələrində plana uyğun olaraq gecə vaxtı təlim-məşq uçuşları keçirən Hərbi Hava Qüvvələrinin MiQ-29 təyyarəsi ilə qəflətən rabitə əlaqəsi kəsilib və aviasiya vasitəsi radarlardan itib. İlkin ehtimala görə aviasiya qəzası nəticəsində hərbi təyyarə Xəzər dənizinə düşüb. Təyyarənin pilotu polkovnik-leytenant Rəşad Atakişiyevin axtarışı və xilas edilməsi üçün təxirəsalınmaz tədbirlər həyata keçirilir. Müdafiə nazirinin tapşırığına əsasən yaradılan komissiya qəzanın səbəblərinin araşdırılmasına başlayıb.