“Gürcüstanın indiki hakimiyyətin Rusiya ilə siyasi bağlılıqları var və onlar Gürcüstanı daha çox demokratik dünyaya inteqrasiyada əngəlləmək üçün hakimiyyətə gəlib. Bu baxımdan da, Rusiyanın “beşinci kalonu” Gürcüstanda çoxdur. Onlar vasitəsilə Cənubi Osetiya, Abxaziya, o cümlədən Cavaxetiya problemlərini yaradıblar”.
Bunu Eurasia Diary-ə açıqlamasında siyasi ekspert Zəlimxan Məmmədli Gürcüstanın Batumi şəhərində keçirilən aksiyaya münasibət bildirərkən deyib.
Onun sözlərinə görə, gürcü xalqı ümumən demokratiya istəyir.
“Ola bilsin ki, 10 minlər küçəyə çıxıb Rusiya ilə münasibətlərin yaxşılaşmasını istəsinlər. Amma 100 min nəfər də ayağa qalxıb demokratik dünyaya inteqrasiya istəyə bilər. Uzun zamandır Gürcüstanda gedən kütləvi aksiyalar mahiyyət etibarı ilə Rusiyanın imperialist, istilaçı siyasətinə etiraz mahiyyəti daşıyır. O baxımdan, Batumidə bu “beşinci kalon” da Rusiyanın mahiyyətini, istəyini nümayiş etdirir. Təbii ki, bu, informasiya savaşıdır, psixoloji savaş da ola bilər. Ancaq Gürcüstan xalqı Saakaşvili dönəmindən qoyulan demokratik islahatları qəbul edib və bundan imtina etmək fikirləri yoxdur.”
Xatırladaq ki, Gürcüstanın kurort şəhəri Batumidə Rusiya ilə yaxın, normal münasibətlər qurulması tələbi ilə on minlərlə adam küçələrə çıxıb. Mitinq iştirakçıları Gürcüstan hakimiyyətindən hərbi alyanslarda iştirakdan imtina etməyi və Rusiyaya düşmən kimi yanaşmağa son qoymağı tələb ediblər.