Xəbər verdiyimiz kimi, Gürcüstanın kurort şəhəri Batumidə Rusiya ilə yaxın, normal münasibətlər qurulması tələbi ilə on minlərlə adam küçələrə çıxıb.

Mitinq iştirakçıları Gürcüstan hakimiyyətindən hərbi alyanslarda iştirakdan imtina etməyi və Rusiyaya düşmən kimi yanaşmağa son qoymağı tələb ediblər. Mitinqi “Gürcüstan Vətənpərvərlər Alyansı” təşkil edib. Çıxış edənlər Rusiya ilə Gürcüstan arasında “ağır mövzular” üzrə genişmiqyaslı dialoqun zəruriliyini qeyd ediblər.

“Biz Suxumi, Sxinvali və Moskva ilə birbaşa dialoq başlatmalıyıq”, - partiyanın lideri İrma İnaşvili mitinq zamanı qeyd edib.

Bu mövzu ilə bağlı Gürcüstan parlamentinin deputatı Azər Süleymanov Eurasia Diary üçün ekskluziv açıqlamalar verib.

A.Süleymanovun sözlərinə görə sözügedən mitinqlər bu günlərdə gürcü hökuməti tərəfindən məqsədyönlü surətdə təşkil edilib:

“Acarıstanda ardıcıl keçirilən bu mitiqnlərə ölkənin müxtəlif yerlərindən vətəndaşları maşınlara dolduraraq gətiriblər. Mitinqlərin məhz bu günlərdə, Gürcüstan və Rusiya arasıda münasibətlərin gərginləşdiyi və gürcü xalqının rus nümayəndə heyətinin ölkəyə gəlişinə sərt şəkildə etiraz etməsi və bu minvalla silsilə aksiyalar keçirməsi dövründə baş verməsi təsadüf ola bilməz. Burada səsləndirilən şüarlara diqqət yetirsək, bu mitinqin keçirilməsindəki əsas hədəfi görə bilərik. Məqsəd Rusiya ilə daha yaxın münasibətlər qurmaq üçün xalqdan istifadə etməkdir. İvanaşvili bu aksiyaları bəhanə edərək Rusiya ilə danışıqlara getməyi planlaşdırır. Bir ay əvvəlsə onun dəstəklədiyi prezident Salome Zurabişvili Rusiyanı işğalçı və düşmən adlandırmışdı. Lakin Zurabişvilinin bu açıqlaması daxili auditoriyanı ələ almaq, itirilmiş nufuzunu bərpa etmək məqsədi daşıyırdı”.

Deputat həmçinin Rusiyapərəst mitinqləri təşkil edən partiyanın siyasi xətti barədə də bəzi məqamları açıqlayıb.

“Batumidəki aksiyaları təşkil edən partiya Gürcüstan Vətənpərvləri Alyansıdır. Bu partiya anti-türk və anti-islamçı mövqeyi ilə seçilir. Partiyanın liderləri, əsas da Turxanov və İnaşvili tez-tez Azərbaycan və Türkiyənin əlehinə ittihamlar irəli sürürlər. Partiyanın tədbirlərində bir nəfər belə azərbaycanlı iştirak etmir. Partiyanın özü isə “əlaltı” partiyadır. Bu partiyanı İvanaşvili və onun dostları maliyyələşdirir. İvanaşvili bu partiyadan istifadə etməklə özünə uyğun ictimai rəy formalaşdırmaq və siyasi uğurlar qazanmağı hədəfləyir. Partiya sadəcə sonuncu mitinqlərdə deyil, hər zaman Rusiyapərəst bir mövqeyə sahib olub. Gürcüstan Vətərpərliyi Alyansı Rusiya-Gürcüstan münaqişəsinə fərqli nöqteyi-nəzərdən yanaşır. Partiya liderlərinin sözlərinə görə Gürcüstan əraziləri işğaldan azad edilməsə, belə danışıqlar aparmaq, Rusiya ilə razılaşmalar əldə etmək mümkündür”, - deyə A.Süleymanov bildirib.

Həmsöhbətimiz hesab edir ki, Rusiya ilə əməkdaşlığa və danışıqlara çağırış şüarlarının səsləndirildiyi mitinqlərin məhz Acarıstan bölgəsində keçirilməsi bir çox gizlin mətləblərdən xəbər verir:

“Mitinqlər niyə məhz Acarıstanda keçirildi? Bura Türkiyə ilə sərhədə yaxındır. Həmçinin Acarıstanda, xüsusilə də Batumidə türk şirkətlərinin milyonlarla dollarlıq investisiyaları var. Bu, Rusiyapərəst siyasət yürüdən İvanaşvili hökumətini narahat edən bir məsələdir. Türkiyəyə yaxın bir regionda bu tipli provakativ aksiyalar keçirməkdə əsas məqsədlərdən biri də bölgəni gələcəkdə rus inevsitisaysına hazırlamaqdır”.

A.Süleymanovun sözlərinə görə bütün bunlar Gürcüstanı yenidən Avrasiya İqtisadi Birliyinə çəkmək üçün oynanan siyasi oyunlardır.

“Bu tipli aksiyalar, pafoslu çıxışlar və digərləri eyni siyasi oyunun bir parçasıdır. Oyunu oynayanların məqsədi Gürcüstanı Avrasiya Birliyinə çəkmək, onun Qərblə əməkdaşlığının qarşısını almaqdır. Lakin gürcü xalqı artıq əvvəlki xalq deyil və buna imkan verməyəcək. Gürcüstan xarici siyasətdə istiqamətini seçib, hədəf NATO və Avropa İttifaqına inteqrasiyadır».

Mövzuyla bağlı gürcü  politoloq Gela Vasadze də Eurasia Diary üçün ekskluziv açıqlamalar verib.

Onun sözlərinə görə, bu mitinqlərin arxasında Kremlinin izi var:

“Bilirsiniz ki, dünənki aksiyaların təşkilatçısı qismində Gürcüstan Vətənpərvərlik Alyansı iştirak edib. Bu partiya yarandığı gündən bu yana Rusiya və Gürcüstan münasibətlərinin yaxşılaşdırılması, problemlərin həll edilməsi, uzlaşmaların, qarşılıqlı razılaşmaların əldə edilməsinə çağırışlar edir. Bu partiya hər zaman anti-türk və anti-islam mövqeyi ilə seçilib. Və son günlərdə bu partiya özünün seçki təbliğat-təşviqat kompaniyasına başlayıb. Partiyanın platformasına diqqət yetirdiyimiz zaman Rusiya ilə Gürcüstan arasında ərazilərin işğalı problemi diqqət mərkəzindən yayındırıldığını və işğala rəğmən Rusiya ilə münasibətlərin yaxşılaşdırılması prinsipinin  yer aldığını görə bilərik. Sadəcə bu faktor belə partiyanın arxasında Kremlinin durduğuna işarə edir. Lakin partiyanın platformasından və çağırışlarından asılı olmayaraq Rusiya Gürcüstan ərazisinin 20 faizini işğal edib və işğal davam etdiyi müddətdə Gürcüstanda heç bir siyasi qrup Rusiya ilə əlaqələri düzəldə bilməz”.

Gürcü ekspert aksiyaların Batumidə keçirilməsinin məntiqi əsasının olduğunu bildirib:

“Batumidə və bütövlükdə Acarıstan bölgəsində təqaüdçülərin sayı olduqca çoxdur. Burada yaşayan insanlar sovet dövrünün adamlarıdır və onların əksəriyyəti sovet dövründəki gəncliklərinin xoş illərini həsrətlə anırlar. Bu səbəbdən burada yaşayan vətəndaşlarda Rusiyaya qarşı xüsusi simpatiya var. Ona görə də Alyansın bu regionda “Rusiya ilə danışıqların aparılması və əlaqələrin yaxşılaşdırılması” şüarları altında mitinqlər keçirməsi normal hesab edilməlidir. Və qeyd etmək lazımdır ki, bu aksiyalarda söylənilən şüarlar heç də bütün gürcü xalqının fikirlərini özündə ehtiva etmir”.

Vasadzenin sözlərinə görə rus və gürcü xalqları arasında ciddi konflikt yoxdur.

“Gürcülər ruslarla yaxşı münasibətlərə sahibdir. Gürcüstanda çoxlu rus yaşayır. Lakin gürcülərin əksəriyyəti Putinə mənfi münasibət bəsləyir. Rus millətiylə isə ciddi problem yoxdur. Bununla belə, rus hakimiyyəti ilə var. Və bu problem ərazilər işğaldan azad edilənədək düzəlməyəcək”, - deyə gürcü ekspert bildirib.

Nicat İSMAYILOV